智取大市 - 晉佳 2019年3月29日
智取大市：生科股仲有排玩 - 晉佳
專做疫苗嘅康希諾生物，係一隻零收入嘅生物科技股，噚日首掛比招股價炒高58%。互聯網圖片 適中字型 較大字型
生科股信達生物（1801）、君實生物（1877）炒上之後近排有回吐，又一隻零收入嘅生物科技股上市，專做疫苗嘅康希諾生物（6185）首掛比招股價炒高58%。
康希諾唯一通過新藥申請嘅伊波拉疫苗，公司管理層喺上市儀式後講到，伊波拉疫苗目前只作為國家儲備疫苗，冇商業化時間表，冇盈利重大貢獻，目前該疫苗只獲中國藥監局認可。管理層行出嚟唱到咁淡，博人唔買佢咁款。
康希諾已通過臨床3期嘅兩隻腦膜炎雙球菌疫苗，其中一隻MCV4，公司招股書形容為「潛在的中國首創疫苗」。腦膜炎雙球菌疫苗係好多人視為小朋友必打item。
疫苗同重大疾病用藥嘅分別，就係疫苗單價低，市場規模好唔同。2017年中國腦膜炎疫苗市場規模20.65億人民幣，預測去到2030年規模都只得70億人民幣；至於2017年整個中國疫苗市場規模253億，預測2030年升至1,000億。中國疫苗市場未來都只升不跌，供不應求問題令大陸家長南下爭住打疫苗，呢個現象只會繼續。
以首日收市價計，康希諾嘅市值76億元，冇收入生科公司有排虧損，值唔值自己定奪，但肯定係香港上市其中一隻優質嘅冇收入生科股。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com