金融High Tea 2013年3月13日
金融High Tea——社保沽貨 散戶學嘢
2013年3月13日
啱啱話緊內地人大開會炒政策市未必咁易炒，昨日內地已率先回吐，上證綜指跌1%，拖住恒指向下，下跌200點至22891點，跌穿20天線，再度逼近10天線大關，形勢麻麻。
內地金融股係拖住大市後腿的主要力量，內銀大股跌1%，內險股就跌得慘啦，最差的是昨日復牌的國壽(2628)，大跌3.2%，收22.55元，拖累內保股全線向下，其中平保(2318)跌2.2%。
內保股腳軟，主要原因係國壽董事長楊明生早前在兩會期間對傳媒表示，按目前市場趨勢，今年的利潤「肯定」會較去年有所改善。國壽上日忽然停牌，並澄清楊明生的言論，只屬個人見解和願望，與公司今年的具體投資策略及業績無關。監管機構要求上市公司作盈利預測時，要出通告，以達到公平發佈的目的，國壽才要澄清自己老總楊明生的言論，但市場對澄清聲明信到十足，當早前楊老闆的「預測」無到，只能解釋為市場根本唔係咁睇好國壽的前景。
太陽能增量減補貼
近期內地市底較弱，阿爺陸續公佈各行各業的新政策，也未必對上市公司有利，例如國家發改委近日向政府機構、太陽能光伏發電企業下發了《關於完善光伏發電價格政策通知》的意見稿，確定區別上網電價，改變了過去全國統一的上網標杆電價。
在建議新補貼方法下，大型地面電站上網電價改變了過去「一刀切」做法，將全國分為四個區。由於內地將大規模擴大太陽能發電規模，在擴大規模兼大幅補貼下，對地方政府構成好大財政壓力，如今變相降低部份地區電價補貼，預計衝擊一直往下轉移，對太陽能設備企業也有壓力。消息一出，太陽能大企業如保利協鑫(3800)股價急跌6%。雖然有補貼方案好過拖住唔出方案，長線亦未必咁大影響，到2015年內地光伏安裝容量將大幅擴展到35GW，即係話價錢唔係咁好都可用量補足，但點講都好，短期對股價都有壓力。
人保無力見好減持
中環茶友話見到社保基金近日不斷減持國企股。據聯交所資料顯示，社保基金在上周三減持人保(1399)60萬股H股，每股均價4.61元，好倉數量由8%降至7.99%。人保昨日跌1.6%收4.44元。社保基金上次減持人保是在1月23日減400萬股，好倉數量由9.05%降至8.99%。
社保基金同樣在上周三減持國藥(1099)25萬股，每股平均作價25.421元，好倉數量由5%降至4.97%。由於持股降至5%以下，以後再減持都不用公佈。
大家講起社保基金係唔係「睇淡」，中環茶友分析，唔可以簡單話社保基金睇淡，佢只係玩緊高沽低揸遊戲，去到某些位，佢認為國企股升到比較高，就開始減持，唔等如佢認為隻股或個市見頂，但既然已升到咁上下，分段減貨，愈升愈沽，都唔係壞事，好似隻人保，1月減咗1%，家又開始沽，仲有9%，有排沽。
茶友更代入社保基金揸莊人的思維，見隻人保在1月10日見咗4.97元一個高位，見回吐至4.6元沽第一浸，見佢2月尾再彈到4.79元一個小高位又回，唔穿上次高位，所以到4.44元又沽，可見社保基金認為人保年頭呢一浸升得七七八八，沽啲貨都唔拘啦。散戶睇住大戶操作，可以學吓嘢喎。
陸羽仁
上一頁 下一頁
金融High Tea 舊文