金融High Tea 2013年4月10日
金融High Tea——導彈市
2013年4月10日
內地昨日公佈3月全國工業生產者出廠價格(PPI)及通脹率(全國居民消費價格CPI)。PPI較去年下降1.9%，CPI升2.1%，遠低於上月的3.2%(創了10個月新高)。PPI低過市場預期的下跌1.6%，通脹溫和，反映總體經濟活動低迷，通脹率大幅下降，係受食品，尤係豬肉價格加速下跌影響，食品價格上漲2.7%，低於預測的3.6%。
數據偏好，內地股市造好，帶領港股續彈。恒指朝早最多升超過260點，但接近22000點，就行人止步。午後跟隨內地A股回順，升幅收窄至152點，收報21870點。國企指數大幅反彈1.7%至10611點。成交只有573億元，今日北韓唔知會唔會真係試射導彈，呢啲導彈市好難知開大定開細，大家都只敢玩大注。
內保股帶動反彈
港股昨升勢較全面，中資金融股出現全面反彈，當中以中資保險股表現最好。主要原因係國壽(2628)受花旗及中金等大行同時唱好帶動影響。
花旗認為，國壽年初創近期高位後，股價已回落近三成，「已抵歷史內涵值低位」，由於公司仍可受惠A股市場和長遠行業增長，就算國壽不是有最好的基本因素，今年滿期給付數額可觀，但相信最壞情況已過。中金睇得更好，國壽目前水平已低於保守預測下的買入價，下行空間有限；給予國壽「買入」評級，目標價27.1元。國壽昨日一度抽高7%至20.7元，尾市回順至20.1元，仍漲4.4%。大行唱好能否令升勢延續，始終要睇內地股市表現，受龍頭股造好帶動，財險(2328)、太保(2601)漲超過4%。
昨日好多人講起文憑科「死亡之卷」的中文閱讀理解，咁啱細價股中有專做補習的現代教育(1082)進軍幼稚園相關業務，涉及金額1400萬元，股價借勢攀升近10%，收報0.225元。以做補習起家的現代教育，喺新高中考試改制下，補習社少咗會考的搵銀機會，雖然家大家改攻中文、通識等科目，好多補習天王收入已今非昔比，現代教育及時上市，但係消退緊的市場點樣維持盈利，依然係頭痛問題，今次進軍幼稚園市場，似乎係提供咗一個答案，至於有概念係咪即係有錢賺，就要時間去證明。
現代經營幼園圖掘金
中環茶友對任何經營理念都係懷疑學派，講到做幼兒教育，佢話做教育賺錢者大不乏人，但不等於人人都會成功，關鍵係點樣做得好。以幼稚園為例，當局已成立委員會研究十五年免費教育，但呢類攞政府錢的學校，基本上係無法賺大錢，想賺錢就要走私校同高檔路線，打響品牌。
曾幾何時，本港幼稚園生意難做，因為本港女性平均一人生育不到一個子女，後來因為有雙非同內地有錢人來港讀書，令名牌幼稚園供不應求，換言之，幼稚園教育產業都係政策市，好受當局規例影響，假如名牌學校被人嘈話學費貴，又話港人讀唔到，以今日民粹政風下，不排除當局又會出招干預，故此搞高檔教育，要有辦法做響個招牌，仲要順風順水唔好被政策干擾。不過，現代教育上市之後反覆尋底，跌到家已經低過資產淨值，上年底集團於銀行結存過億元現金，趁住有新業務，股價即刻就有反應。
陸羽仁
上一頁 下一頁
金融High Tea 舊文