魚樂無窮：一個創板神話的誕生 - 唐牛
■筆者今日推介嘅中國汽車內飾，絕對有力締造另一個創板神話；圖為該公司主席莊躍進。資料圖片
阿里巴巴棄港赴美上市，創業板之父羅嘉瑞建議阿里喺創業板上市，順便搞活呢個二奶板，以收一舉兩得之效。創業板成立多年，備受冷落，用一池死水形容絕不為過；話雖如此，創板股份其實臥虎藏龍，一旦升呢上主板，爆發力無極限──遠至網龍(777)、中生製藥(1177)、新奧燃氣(2688)，近期如華彩控股(1371)，股價無不以幾何級數上升；如果能夠識於微時，回報隨時大到你唔信。
今日推介嘅中國汽車內飾(8321)，絕對有力締造另一個創板神話。公司主要製造及銷售用於汽車內飾件及基建嘅無紡布產品，及供應及經營採購包括買賣橡膠，去年業績大躍進，收入大升2.3倍至5.4億銀(人民幣．下同)，帶動盈利勁升3倍至4,304萬銀；中汽協預期今年汽車銷售將再升一成，今年業績只會更亮麗。
公司2月申請上主板，並不涉及發行新股，旨在提升公司形象，增加股份流通量等，其實潛台詞就係要引入基金。事關主流基金很少染指創板股，令公司失去做大做強機會。如果成功轉主板，以其亮麗業績，要引入策略性投資者，可謂易如反掌，最新市值只得7億港紙，可塑性甚高。近日成交明顯增加，唔排除聰明錢已進場，現價買入博一個神話，諗得過！
唐牛
上一則: 博弈穿雲：海爾湊大 龍昌有睇頭 - 俞亮
下一則: 股場放大鏡：大行睇好中外運孖寶 - 歐陽風
魚樂無窮 - 唐牛 舊文