中環在線：約投行傾上市專車接載馬雲見賓架變神秘密會 - 李華華
■馬雲平日作風高調，不過講到阿里上市咁大件事，即刻變得神神秘秘。設計圖片
阿里巴巴上星期決定赴美上市，前日叫曬五間有份參與嘅外資投行賓架在港召開第一次大會，呢類新股上市會議，通常唔喺公司寫字樓，就喺投行寫字樓召開，偏偏阿里要玩神秘，喺一個私人會所租咗間房開會，一班投行賓架都要去到見到阿里創辦人馬雲，先至知道真正嘅開會地點。
賓架避談怕得失阿里
聽聞，阿里召開呢個上市會議，事前安排極之神秘，冇講明開會地點，只係叫相關嘅投行賓架乜嘢時間喺自己公司樓下等，阿里派專車接載佢哋去開會地點。佢哋去到先至知道，係喺一個私人會所開會，會議一開就幾粒鐘。大堂水牌亦都冇寫到阿里巴巴個寶號，只係求其寫一間公司名。
乍聽呢件事仲以為係電影橋段，好多講綁票救參嘅電影，總有條橋，講綁匪透過電話指示主角坐車去邊度邊度丟底贖金。睇嚟馬雲除咗鍾意寫書法，閒時亦可能喜歡睇警匪片，今次就借用呢條橋，神神秘秘咁，派車接載賓架去指定地點開會。
現階段有份參與阿里上市嘅投行包括瑞信、摩根士丹利、高盛、摩根大通同埋德銀。阿里赴美上市，投行都會搵番做開美國新股市場嘅賓架擔大旗。
聞說，呢幾間投行今次多數由歐美派幾位高層來港跟阿里高層開會，佢哋本身都唔太熟悉香港地方，其實去邊度開會都差唔多。
開會嘅地方都要如此密實，會議內容就更加要保密。阿里好似仲諗咗條計仔，令到幾間投行嘅賓架唔敢私下走漏任何風聲，生怕會被阿里踢出局，平白損失呢單巨無霸新股生意。
李華華
mailto:LiWaWa@AppleDaily.com
上一則: Candy Crush曾破底
下一則: 中環在線：慳儉呂志和破例豪買遊艇 - 李華華
~TITLE_S~中環在線 - 李華華 2014年3月27日 舊文