陸羽仁 BLOG 2014年3月27日
唞唞氣再嚟
2014/3/27 上午 08:37:38
網誌分類: 經濟
美股上日反彈，昨日打回原形。股市恐懼指標VIX指數跳升8.4%至上日位置，反映投資者對大市前景無乜方向，大市跟住生化股及科網股炒上炒落。
朝早出爐的美國經濟數唔錯，2月耐久品訂單較上月大增2.2%，遠好過市場預期的1%及上月的下跌1.3%。3月MARKIT服務業PMI初值升至55.5，交亦好過上月的53.3，服務業升溫，民間經濟活動有所增長。美股早上造好，之後轉出奧巴馬警告俄羅斯的言論，科網股又借勢大插，拖住大市一路向下。
道指跌99點，收16269點；標普500指數挫13點至1853點，完全抹去了上日升幅。納指插61點，收4174點。繼續跑輸大市，無他，科網股近期升得太急勁，回調幅度較其他板塊大些，都好正常。
總統奧巴馬在歐美布魯塞爾峰會上，警告俄羅斯如果「進一步侵略烏克蘭」，會與歐洲團結起來支援烏克蘭，包括提供緊急支援，以及施行更嚴厲的制裁。美國真係制裁俄羅斯的話，好多依賴俄羅斯石油與天然氣的國家將會受到影響，産生廣泛的全球效應。
投資氣氛受到影響，此前升得最急勁，近期有些腳軟軟的科網股，自然成為投資者鎖定利潤的第一選擇啦。其中Google跌2.3%，Priceline跌3.9%，亞馬遜跌3.2%， Twitter插7.2%， Facebook宣佈用20億美元收購虛擬實境遊戲開發公司Oculus VR Inc，Facebook股價急挫6.9%。生不逢
此前賺到盤滿砵滿的熱門手機遊戲Candy Crush開發商King Digital Entertainment，昨日掛牌上市。生不逢時，股價暴跌15.6%，亦大大打壓了市場人氣。King Digital定價22.5美元，昨日朝早最高見過21.39美元，低見18.9美元，收市19美元。新股首日股價全日潛水，係新股市場撞今年罕見。據資料顯示，今年上市的新股至上日為止，共55隻，掛牌首日平均大升22%，其股價亦有唔錯表現，平均升幅達到29%。
不過，新股市場近期開始有轉弱的跡象，上周上市的A10網絡，定價15美元，昨日收14.55美元，跌破上市定價。同係上周上市的Paylocity, MediWound, Amber Road，以及Q2 Holdings，首日上市均跌破定價。隨後雖然上番定價樓上，但升平均升幅已經大不如前。
有分析指King Digital首日上市即插15.6%，未必係隻股唔得，可能係定價太高，(定價市值去到60億美元)。但已製造了一個IPO市場的漣漪效應，驚慌未至於，但惹起市場的關注，肯定有。
觀察IPO市場是否出現危機，投資者應該留意兩點：新股取消上市及重新定價。現時仍未見取消上市的案例，但重新定價的風險愈來愈高。今日將有三隻，明日五隻新股上市，今日嘅有生化科技公司Applied Genetics，定價13至15美元；風險投資貸款公司Square 1 Financial，定價15至17美元；以及人力資源外判公司TriNet Group, 定價都係15至17美元。如果它們提出延期上市，或者降低定價。大家就要打起十二分精神啦。
新股市場略為回軟，唞唞氣，都係好事。呢個同香港炒科網股一樣，阿裡巴巴宣佈有新搞作，佢嘅「孖寶」中信21世紀(241)及文化中國(1060)昨日又現鑊味，分別爆升20%及13%。股票就係咁，升得太多就會跌，跌得太勁，借呢依，又炒番高，好似騰訊(700)咁，由二百幾蚊，幾個月內急炒上646元，近期跌番近100蚊至554，都唔係好過份呀。只要市場有料到，又會炒過，所以話科網爆煲，言之尚早。
值得留意嘅係美股收市後，聯儲局公佈第二輪銀行壓力測試結果，30家銀行之中，聯儲局拒絕了花旗集團、匯控 、蘇格蘭皇家銀行、西班牙國際銀行及Zions Bancorp提交的資本計畫，認為前述4買家銀行資本規劃過程有不足之處。Zions Bancorp則因為未能達到資本比率最低要求。這5家銀行將不允許執行擬定的派息和股份回購。消息公佈後，花旗收市後急挫超過5%。美國匯控正常時段收市跌0.4%。
陸羽仁
回應(1) 我想回應
陸羽仁 BLOG 舊文