金融High Tea 2014年3月27日
美網是瞻
2014年03月27日
美股造好，港股自然順勢再向上夾，不過，大戶砌上都唔易借力，皆因先前最有鑊氣的科網股同濠賭股都馬力不足，要靠撩高傳統中資股去推高大市，但呢類股份蟹貨不少，扯兩扯就有回吐壓力。
科網股近日再軟，龍頭騰訊(700) 公佈業績時宣佈拆細，可惜對股價無乜幫助，同一時間又爆出阿里巴巴去美國申請上市。有茶友話，兩大龍頭好似有小小散水樣噃，科網呢一浪係唔係面臨爆破呢？陸羽仁就話，香港科網爆唔爆破，唔係睇騰訊同阿里兩隻股咁簡單嘅！
茶友瞪大對眼等聽落去，陸羽仁話，炒股要睇氣候源頭，呢期港股受制中國產業升級的尷尬期，無乜好消息同概念可以大力炒作，大戶要搞作更加要依賴美股。美股係全球科網霸主，尤其蘋果iPhone，即刻打殘咗歐洲手機生產商同埋鄰居加拿大的黑苺，喺應用方面，幾家網企更係雄霸全球。
雲遊穿底嚇親人
內地網企可以也文也武，唔係佢哋好打得，而係全賴中國政府嚴禁開放市場，等佢有大大個餅慢慢食，故此基金大戶唔係睇好內地科網營運有道，只係睇好佢哋可以獨食啫。
所以大戶炒科網股可以炒得幾勁，全部都係美股先表現出嚟，內地科網股只係跟炒啫，文雅啲講，內地科網股雖然市值驚人，都係附人驥尾，唯美國網企馬首是瞻，所以無論騰訊拆細、抑或係阿里喺唔喺香港上市，都係屬於小氣候而已。
美國網企鞏固調整，納斯達克相關指數顯著回軟，香港先係龍頭股乏力，其他跟炒股份跟着就有感應，紛紛下墜，手遊股雲遊(484) 周初跌穿招股價，昨日再插一棍，佢高位73.95元，昨日跌穿49元，呢吓震一震殺傷力都幾大。由於佢已經破咗招股價兼創新低，即係話小股東基本上無贏家，咁跌法對科網股炒家都造成心理殺傷力。
網企同疑似網企早排雞犬皆升，家就逃唔過地心吸力的物理現象。好似隻貿易通(536) 早排大幅炒上，呢輪反覆下調咗差不多三成。該公司核心業務係政府電子貿易服務(GETS)，行政總裁吳偉驄坦言未來增長空間不大，日後會朝着電子錢包等方向發展。佢預期電子錢包業將於4、5月推出，預期該業務將在今年錄得盈利貢獻。貿易通就係靠呢個電子支付概念，未賺錢已經炒上嘞。
中信一石二鳥拆炸彈
吳偉驄仲透露，電子支票業務，今年將有初步前期工作，並於明年推出市場。除C2C業務外，今年還有一個更大型項目將推出，但暫時未能公佈詳情，預期該業務會成為集團新亮點。如果網股當炒，可能又會借呢番說話有炒作，可惜呢幾日這類股份無厘火氣，自然唔同講法啦。
港股全日造好，一度飆274點，無奈未能企穩。恒生指數收報21887點，升155點；國企指數收報9849點，升158點，成交金額739億元。
呢排股仔消息不少，昨日就有六家公司停牌，包括中航科工(2357) 、金山工業(040) 、百利大(495) 同順豪系三家公司。令人矚目係早前停牌的中信泰富(267) ，外電引述消息話，中信集團將會注入價值400億美元(約3100億港元)資產換取新股，中信集團會遷冊至香港，成為香港公司。
知情人士形容這是國有企業改革的重要一步，國務院已批准計劃。照睇，呢次安排亦解決咗中信泰富投資澳洲搞到周身傷的難題，連消帶打，順手拆咗個大炸彈，當然付出代價都唔少啦。
陸羽仁
金融High Tea 舊文