金手指：我最愛的互通股 - 孫柏文
■筆者分析認為，如果貼滬港通最有利是港交所，無疑太正路。路透社
上個禮拜，分享過孫柏文喺互聯互通宣佈嗰日朝早，即當只有消息冇細節時，喺facebook上叫買浙江世寶(1057)。由我叫買嗰刻到之後叫落車嘅幾個鐘頭，浙江世寶升咗三成八。咁要重提「浙江世寶互通」個post嘅原因係因我之後喺facebook應承咗話會分享喺互聯互通下，我至喜愛嘅股份，特別係當深圳上市嘅A股冇份嘅時候。點知到今日我都未分享我最like邊隻。首先，我唔明點解得上海有份而深圳冇，點解上交所handle到嘅事深交所唔得，不過遊戲規則係咁就係咁。
我亦明白到最穩贏嘅互通概念，就一定係「一注獨贏港交所(388)」，唔係淨得我咁講，雜誌封面都係咁叫。我自己見呢個雜誌封面時有兩個反應，第一係「一注獨贏」一詞被我發揚光大了！估唔到我呢個讀國際學店大嘅人，歷史喺未來會話對中國語文都有貢獻！真係唔認勁都唔得。
我見個封面嘅第二個反應，就係貼港交所太正路，股價會唔會極速反映曬呢個消息？我唔知。不過我覺得如果我貼港交所，就會唔合乎我呢個走詼諧路線實力派財經演員嘅形象。
我始終覺得喺啲有差價嘅AH股當中搵最賺錢嘅目標股會贏多啲。不過問題係，AH股有差價，究竟係H追A定掉轉或甚至唔converge？牽涉嘅因素由兩地嘅股數發行量比例到實際股價都要睇。多唔使講，香港班投資者，公司發100股賣100蚊一股，同10,000股賣1蚊係一樣，不過大陸班賭徒，就覺得100蚊嗰隻「貴」，1蚊嗰隻「抵買」。
南京熊貓上周停牌
其實喺互通下，我做完功課、平衡所有因素後，原本覺得最好嗰隻係南京熊貓(553)。點知佢喺互通宣佈後翌日停牌，停到我落筆呢刻仲停緊，佢喺上周update話會同母公司來次「重大資產重組」。如果要我估即係學中信泰富(267)咁。即係復牌第一日裂口高開後係咁回到冇得追啦！哎，又要再度過。
獨立股評人孫柏文
http://facebook.com/shuen
本欄逢周二刊出
上一則: 青心直說：改革須深層意義 - 胡孟青
下一則: 一周三件：金榜食到正國策 - 錢雋
金手指 - 孫柏文 舊文