中環在線：彭博女神曾選港姐「樣靚，客人聽多啲」 - 李華華
彭博女神失落港姐又如何
彭博資訊機有個MVP(Most Viewed People)功能，用來搜索最多人搜尋嘅名字，早排農銀國際有位靚女sales陳敏芳(Rachel)因上載一張自拍照而爆紅，曾榮登榜首，旋即被人起底，原來佢係2006年落選港姐。佢好快明白喺娛樂圈就算靚女都唔值錢，翌年就投身金融業，指「樣靚幫唔到生意，但對方會畀多少少耐性聽你講嘢」。
Rachel曾參選2006年港姐，同屆對手有陳豪老婆陳茵媺、已成為少奶奶嘅徐淑敏同埋剛大肚嘅呂慧儀。佢落選後試過拍MTV，又做過茄哩啡，最後決定放棄娛樂圈，事關「(娛樂圈)不斷有新嘅女仔出現，就算靚女都好唔值錢，娛樂圈成功機會率好細」。
■Rachel話喺彭博機上載自拍照後，有成百幾個人想add佢。陳奕釗攝
■Rachel(左二)曾參選2006年港姐，同屆有陳茵媺(右一)。資料圖片
累客輸錢靚都冇情講
咁啱嗰陣有位朋友介紹佢去法巴做股票sales，佢亦想搵多啲錢，等當時喺中餐館做傳菜嘅媽媽唔使咁辛苦，所以決定轉行。雖然佢年薪未過百萬，但陳媽媽𠵱家退休，佢當初嘅目的達到了。
經過差唔多七年嘅股票sales生涯，Rachel承認「靚女喺呢行嘅機會稍為大啲啲」，客人可能會畀多少少耐性聽佢講解，但講到底，都要幫到個客賺錢先有用，「如果累個客輸錢，咁就乜都冇情講」。
因此，除咗讀報、睇資料等基本功，佢亦會用心記低客戶嘅投資風格，經佢落單嘅股票資料，如幾時買、乜嘢價位買咗幾多等等，隨時幫客戶留意相關股票嘅消息。佢再三強調，呢行齋賣樣行唔通，「人哋見完你一次，八卦完後，幾靚女喎，咁就冇下文都冇用！」
Rachel喺彭博機上載自拍照後，的確有唔少人透過WeChat想識佢，「𠵱家WeChat有成百幾個incoming requests」。可惜當中真係想搵佢傾生意嘅就唔多，仲有唔少搞事份子，「有啲我唔accept佢嘅request，就會講粗口鬧我！」
甩拖半年唔吼金融才俊
憑一張自拍照成為「彭博女神」嘅陳敏芳(Rachel)，自從半年前甩拖後，感情方面仍未有著落，雖然今年已經33歲，但係佢一啲都唔擔心俾人話係「盛女」。所謂做嗰行厭嗰行，金融才俊竟然唔係佢嗰杯茶。
男友要幽默夠浪漫
Rachel開出嘅擇偶條件話易唔易，話難唔難，佢希望對方要有幽默感，夠浪漫，負責任，最好唔係喺財金圈工作，「我覺得呢行啲男仔比較現實啲，我自己傾向唔搵返呢行嘅男仔」。
雖然工作繁忙，但呢個唔係Rachel冇拖拍嘅理由，佢都話「𠵱家工作每個星期都會見到新嘅人，機會其實好多，所以我唔可以complain因為工作，所以冇機會」。佢話𠵱家感情空白，最主要嘅原因都係未遇到Mr. Right啫。
李華華
mailto:LiWaWa@AppleDaily.com
■Rachel話做金融呢行嘅男仔比較現實，唔係佢杯茶。
上一則: 卡塔爾減建世盃球場
下一則: 中環在線：葉澍堃乖孫搶閘做白羊座BB - 李華華
中環在線 - 李華華 舊文