一周三件：金榜食到正國策 - 錢雋
■筆者分析指，金榜集團估值低，追落後值博率高。
剛啱上個月尾，總理李克強考察瀋陽，專登到訪一間小額貸款公司，當場要求財金官員研究支持呢類貸款企業。阿爺鼎力支持，祖國財仔公司有運行。當中，金榜集團(172)有前中信董事長王軍做掌舵，PB又最抵，贒贒好。
有統計指出，祖國銀行貸款審慎，加上商業銀行數目未夠多，根本滿足唔到中小企貸款嘅需求，估計中小微企貸款行業，可以keep住20%樓上增長，而到2017年時，呢類貨款餘額，將會高達2.1萬億銀人仔，係2012年時嘅4倍！再講，總理啱啱落咗order，隨住新支持政策出台，祖國財仔公司包括金榜在內會繼續肥仔。
估值低PE不足7倍
事實亦係咁，金榜2014年(3月結)上半年，純利已經一枝箭飆咗37倍到近1.1億銀，兼追貼2013年成年純利1.2億銀。係咁意估，集團2014年下半年EPS，只係上半年一半，到近2仙，全年EPS近6仙，PE跌到得6.9倍。
更吸引係，金榜PB得0.5倍，場內行家中國金融(605)連配股後，PB1.07倍。曾有意上市招股嘅瀚華金控，參考計劃上市上、下限價，PB1.2倍至1.46倍，金榜平咗一大截。
又大孖沙王軍，家陣出任香江上市公司主席，得兩間咁大把，一家係已經過手畀阿里巴巴嘅中信21世紀(241)，另一間就係金榜。
至於副掌舵黃如龍，加入金榜前，曾任Pacific Resources(PP)總裁，有超過30年世界性消費品採購及物流經驗，而PP兼喺截至2002年嘅12年間，係沃爾瑪全球獨家採購商，好有家陣新經濟體feel。掌舵背景實力，好有遐想。回歸現實，金榜當追落後，PB上返0.8倍咁大把，都要升60%，到0.6元。
細價股專家錢雋
本欄逢周二、三、五刊出
上一則: 金手指：我最愛的互通股 - 孫柏文
下一則: 板塊尋寶：炒錯藥股慘過吸霧霾 - 王昇
~TITLE_S~一周兩件 - 錢雋 2014年4月22日 舊文