智取大市：股票贏家講的是信念 - 晉佳
■投資者要記住，賺錢，決心同信念都唔會係偶然。
作為投資者，喺股票場上贏多定贏少，係睇你贏咗幾多個對手。就等如考公開試拉curve，100個人當中，你考第一，一年回報可能係幾倍嘅股神級；你考第30，可能打和；你考第90嗰個，就可能輸70%輸到嘔白泡。你當然想成為頭30名，即係贏錢嘅人，但係進佔30名之後，可能又要長期成績係首15名，先至可以致富。
經過晉佳咁多年觀察，喺股票戰場上面贏錢嗰首15名人士，多數都係趨勢投資、投機者，即係升先追、跌就沽嘅一群。同輸錢散戶最大分別，可能就係平時做多啲功課，入市經驗比較豐富，反應比較快，贏就贏得多啲，輸就輸得少啲，拉勻都係贏。每次能夠準確地恐慌性買入呢啲高難度動作，大可以留畀考第一嗰位英雄去做。
生活喺呢個股票賭場，唔少人一入場係考第30、40，慢慢就被市場打亂節奏，變成考第70、80，然後斬手指戒賭。隔一排個市好番，見有人贏錢，自己隻手指又唔知喺邊度生番出嚟。
唔好講到話要做成功嘅投資者咁偉大，要變成靠股票贏錢、買到車買到樓嗰批人，最重要係點樣學識經歷輸家、間中贏家、經常贏家嘅過程。當你發現自己成為經常贏家之時，原來其他投資者亦一直進步，到時要繼續比市場進步得更快。唔能夠贏咗錢後「回塘」，隨時跌落第70、80名就更挫敗。
晉佳身邊戰友唔少都係股市贏家，點解佢哋能夠走埋一齊，唔講緣份咁老土，信念先至係最大因素。由讀書時想喺股票市場贏錢，然後矢志入行學習，再拎自己儲蓄出嚟打拼，同一信念決定大家走埋一齊，一切並非偶然。如果你係輸錢嗰位，就要諗嚇自己過去股票路係點行。要記住，賺錢，決心同信念都唔會係偶然。
耐心靜待大升浪
講番個市，咁靜，好炒嘅時候過咗，細價科網股散曬水，首輪整固之後，理論上唔會咁快有第二春番嚟。即係話，贏大錢嘅良機暫時唔會出現，咁就索性觀察嚇，做嚇功課。
或許之前科網股、濠賭股炒上太過激。望到優質二、三線股創科(669)、中燃氣(384)破頂，感覺不太大。況且呢類股升嚇升嚇，日線、月線圖RSI都頂背馳。呢個位估值上升空間又似有限，回跌又合理，值博率一般，惟有畀啲耐性等下一浪嘅機會。有耐性嘅話，短則一兩星期，長則一年半載，機會總會出現，想急都急唔嚟。機會，就好似自己屋企人一樣，出夜街幾夜都會番屋企瞓覺，只要知道佢遲早會番嚟，就已足夠。
晉佳
本欄逢周三刊登
上一則: 一周三件：中國光纖有計 - 錢雋
下一則: Follow Me：哈電可受惠核電重啟 - 高彰坡
智取大市 - 晉佳 舊文