中移動唔掂
2014/4/23 上午 09:46:40
網誌分類: 經濟
雖然好多人鐘意中移動(941)話佢係現金牛，但我從來都擔心它正步入漫長的業績倒退中，佢昨日發布首季業績進一步證明我的擔心，中移動今年首季純利按年跌9.4%，至252.44億元人民幣，遜於預期。一般相信中移動利潤連續第3季下滑，主要受累於補貼蘋果iPhone及網絡建設費用。該公司還首度公布4G客戶數有279萬戶，亦低於市場預期，不過中移動就將全年4G上客量由5000萬戶再提升至1億戶。
期內中移動每月每戶平均收入(ARPU)繼續下跌，由去年同期的68元，跌至62元，主要受低用量客戶增加、一人多卡現象普及以費用穩步下降等因素影響。營運收入1548.28億元，按年增7.8%；除息稅及折舊攤銷前前盈利(EBITDA)為575.9億元，按年跌5.9%，即係話未計折舊盈利都係跌，現金收入都在下跌中。
中移動首季4G上客量唔多，未來若上客多，若是iPhone客，估計每客要補貼2000元，若上酷派那種平價4G手機就好好多。中移動將4G上客量再提升到1億，即使成功，也可能要好大補貼，對盈未必有利好影響。
我一直唔睇好中移動，係因為騰訊微信的服務上得太快，除了訊息外，微信由語音留言、即時對講、發展到今天的語音通話，我陸太去了大陸我都係用微信語音通話搵佢，你話食咗幾多中移動的生意? 訊息、跨省長途、跨國長途收入難免下跌。呢一浪4G本來都唔易食，但今年食埋4G，明年仲衰。
中移動自己都認受到衝擊，話期內即時通訊(OTT)對傳統通訊業務替代加劇，中移動客戶總通話分鐘數增長放緩，按年僅增0.6%。
我就話大勢已成。中移動而家9.1倍市盈率、4.7厘息率，仍然太高，你話內銀唔好，你睇建行(939)
盈利都仲未下跌，但市盈率已低至4.1倍、7.1厘息率，內銀雖唔好，好過中移動喎。雖則中移動跌得多時會彈吓，市況唔好時又會吸納一點避險資金，但我估佢唔掂，未來跑輸大市。 另外睇睇美股，巨額併購交易消息以及多家美企公布好過預期業續報表，推動美股造好。美股第六日向上，杜指升65點至16514點；標普500指數漲8點，收1880點，納指升40點，報4161點。
加拿大製藥商Valeant Pharma International昨日周宣布，計劃以每股48.30美元現金外加0.83股普通以，收購除皺與瘦面美容藥品BOTOX製造商Allergan，涉資總計高計456億美元。Valeant此前收購了眼睛護理產品博士倫(Bausch & Lomb)。受收購消息刺激，Allergen勁升15.3%，Valeant亦大漲7.5%！
另外，包括Netflix、紐約梅隆銀行、哈雷戴維森(Harley-Davidson)、 Travelers及United Technologies 等多家美企，業績都好過預期，其中Netflix股價都大升超過7%，哈雷戴維森升超過6%。
經濟數據方面，3月成屋銷售較上月下跌0.2%，至459萬間(年率化)，略差過市場預期的460萬間，已經連跌3個月。過去3個月，平均460.3萬間，遠較去年第四季的494萬間為低。分析早前歸咎成屋銷售唔好的原因係特別嚴寒影響，但3月的天氣已經回暖，但銷售卻未見反彈。比較合理的解釋應該係屋價較前貴了，據FHFA的屋價指標顯示，屋價連續兩個月上漲，2月漲0.6%，1月則升0.4%。
另外，按揭利率亦在向上，美國30年期固定房貸利率已較一年前攀升近1個百分點，進一步壓低民眾的負擔能力。首次置業者係推動美國房地產市場固定成長的主要力量，2012年3月，首次置業者佔總體買屋者33%，今個月卻只有30%。
大市連升六日，投資專家又有嘢講。《The Gartman Letter》的編輯兼發行人Dennis Gartman，月初在《Fast Money》節目話大市唔掂，已經嚇到佢投曬降。佢當時話，現金可能是一兩個月內最安全的地方，但估唔到唔夠兩個星期，上日喺同一個節目，佢又話「愉快地睇好」，認為大市可以升得更高。又補充，即便大市跌了兩周，標普500指數成分股普遍表現不好且向下探底，但仍勉強保持在100日移動平均線的水位，他認為市場仍然向好。睇完佢左轉右轉，只能夠話「財經名咀難做呀」。
陸羽仁
回應(4) 我想回應
陸羽仁 BLOG 舊文