魚樂無窮：敏華平過回購價可諗 - 唐牛
■敏華1月發盈喜後頻頻回購，證明管理層信心十足。圖為敏華控股主席𤏸敏利。資料圖片
雖然過完復活節，但似乎港股同A股都未能復活。華潤老總被查，全系被洗倉。廿大成交股份，得幾隻升，仲要係微升，投資氣氛繼續曳。相反成日俾人話位高勢危的道指，仍然高企16000點樓上，美國經濟繼續復蘇，睇嚟都係無乜懸念。睇下創科(669)股價走勢就知，近期港股咁曳，佢仲可以逆市創新高，認真唔講得笑。
其他受惠股，敏華(1999)必然係其一。呢隻2013年強勢股，中北美洲營業額佔過半，難怪去年股價勁升九成，但隨住近期美國一手及二手屋銷售數字回落，今年股價亦都跟住偏軟。
敏華1月發盈喜之後日日回購，價錢都係介乎於13.42至14.60元，證明管理層信心十足。上星期再發盈喜，刺激股價逆市抽左一棍，現價都仲比1月公司回購價低，值搏率高。若然企得穩13蚊，可以小注買入，上望1月高位14.80元。
日圓貶值有利四洲
如果嫌敏華發咗盈喜唔夠爆發力，又可以趁悶悶地發掘下潛在盈喜股。經營零食物語及多間日式食肆嘅四洲集團(374)。受惠日圓貶值及控制成本得宜，公司截至去年9月底中期盈利，按年增長63%，至7,112萬元。睇番日圓近半年持續弱勢，兌美元大部份時間企喺100樓上，四洲肯定繼續受惠。保守估計下半年盈利較上半年再升兩成，即全年可賺1.6億元，按年升幅有五成，又到咗盈喜起錶價，屆時市盈率回番去13倍，買落亦舒服，不妨留意。
唐牛
上一則: Follow Me：哈電可受惠核電重啟 - 高彰坡
下一則: 股場放大鏡：華油泊大碼頭買得過 - 歐陽風
魚樂無窮 - 唐牛 舊文