異動空間：零持倉vs大挾倉 - 魏力
如你昨早忍痛止蝕清倉，全力備戰世界盃，個市晏晝挾足321點，騰訊(700)倒升，金山軟件(3888)轉綠，中移動(941)、友邦(1299)爆到牛三一樣，不知有何感想？M君熄報價機，高呼「及早離去」(「大時代」經典語句)；H君慨嘆「十個戰友，九個萬念俱灰」，T君也無奈說「跌市根本不用理由」，個市就升畀你睇，100點？又扮反彈引我追，今次唔會上當！200點？齋挾三幾隻藍籌，畀啲誠意好喎！300點？乜料呀，我今朝先清倉咋喎！
好困惑，好無癮？係咁㗎啦！(黃子華「係啦定律」)追貨驚再輸，唔追驚執輸？好出奇？(黃子華「好呀法則」)一句到尾，家陣應該點做？吉倉的話可拎本金10%買一兩隻當試水溫，再挾都叫有份贏，又中伏咪當過大海玩兩手。
如成手蟹貨，趁反彈減一點，起碼有子彈第時追貨。昨日低位撈咗？恭喜你，真高手，食糊幾時都得啦！
值得留意，昨率先反彈係莊家股，如中國信貸(8207)、文化中國(1060)等，大部份強勢績優股都係尾市先跟挾，力度亦一段，彈散格局料未逆轉。另外，聯通(762)首季績佳，股價大成交爆上，值得關注。
魏力
http://www.facebook.com/2012jason
上一則: 何車500：鄭煤機趁低收集 - 何車
下一則: 青心直說：電子煙生意經 - 胡孟青
異動空間 - 魏力 舊文