魚樂無窮：吼實增持與回購股份 - 唐牛
■翠華管理層近日出手撈貨，相信管理層嘅眼光，現水平絕對值博。資料圖片
港交所(388)收市後有記者會講滬港通詳情，春江鴨率先做嘢，恒指尾市一句鐘發難，挾高200點，埋單升321點。升市動力主要來自中資電訊股，市傳內地今季批出FD-LTE 4G牌照，中移動(941)、聯通(762)、中電信(728)齊齊搶高半成。內銀內險等舊經濟股搶鏡，帶動新經濟股回穩，騰訊(700)、金山軟件(3888)倒升收場。執筆之時未知滬港通最新消息，但由於十個散戶九個離場，丁點好消息已足夠炒起個市，仍有意慾落場嘅戰友，不妨留意個股炒作機會。
現階段有乜股博得過？近期有增持或回購活動嘅股份可優先考慮，始終佢哋最了解公司內部運作，肯真金白銀做嘢，絕對唔係齋托價咁簡單。好似藍籌股王騰訊(700)咁，之前喺500蚊水平回購，其後刺激股價急彈一成，啡底股地位亦一直守住。
華彩翠華露手影
今日推介兩隻同類股畀大家參考。第一隻係華彩控股(1371)。受疊碼仔走佬傳聞影響，濠賭股風聲鶴唳，華彩亦慘遭狂沽。查實公司與澳門博彩無甚關係，洗倉甚為無厘頭。公司噚日公佈，喺0.52至0.58元水平回購4,550萬股，戰友可以此作標準短炒。
第二隻係翠華控股(1314)。以李遠康為首嘅管理層，今年1月喺5蚊水平減持公司股份，之後股價一直拾級而下，可謂完美靚沽。近日佢哋又再次出手，不過改為撈貨，平均價介乎4.11至4.19元，信管理層嘅眼光，現水平絕對值博。
唐牛
上一則: Follow Me：新世界一年博升45% - 高彰坡
下一則: 股場放大鏡：津創隨時翻炒咪走雞 - 歐陽風
魚樂無窮 - 唐牛 舊文