中環在線：兩成會計師每周狂做61個鐘 - 李華華
會計師喪do 60粒鐘四成半人想轉工
會計、核數師每年都有幾個月為埋數忙到氣咳，隨時一日做十幾粒鐘。澳洲會計師公會今年3至4月訪問350名來自會計師事務所、上市公司、跨國企業等嘅會計專業人士，發現有近兩成人每周工作逾61粒鐘，假設五天工作，即係每日做超過12粒鐘；難怪有近五成計劃未來半年搵工跳槽。
■會計業工作量大，行家一日做多過12個鐘絕對唔出奇。
收緊準則工作量大增
會計專業發展基金主席林智遠表示，60小時已經唔算辛苦，佢聽過有行家話朝9晚12，甚至做到淩晨兩三點都有，「最誇張嗰陣，一星期返足7日，連續一兩個月」。
林智遠指，投行賓架與律師嘅情況差唔多，只不過香港有三萬名會計師，變成總有一個喺附近，情況先好似特別嚴重。喺大行工作嘅核數師壓大更大，除咗因為上市公司客戶要年尾做年結，令核數師1至4月特別忙；近年會計準則不斷收緊，亦導致行內人工作量增加10倍，可惜核數費唔係加好多。
雖然澳洲會計師公會嘅調查話，有65%受訪者支持推行標準工時，其中逾四成建議每周標準工作40小時，但香港會計師公會會長陳錦榮就潑冷水，指訂立標準工時解決唔到問題，因大家都要趕死線，工作量冇減少，訂標準工時，結果只會係大家做唔曬啲嘢。
澳洲會計師公會大中華區分會會長任德煇指，今次調查結果跟去年差唔多，反映僱主冇推措施改善問題，建議管理層多跟員工溝通，推行「留才花紅」等計劃挽留人才。陳錦榮都建議，僱主畀員工超時補水最實際。
李華華
mailto:LiWaWa@AppleDaily.com
上一則: 愛馬仕首季收入飆一成
下一則: 中環在線：中原花紅縮水派0.35個月糧 - 李華華
中環在線 - 李華華 舊文