魚樂無窮：東嶽強勢博上四字頭 - 唐牛
■東嶽集團斥資10億人仔，入股有民營版中投之稱嘅中國民生投資，泊住個大碼頭。資料圖片
五窮月過咗三分之二，恒指暫時升咗700點，大概3%。表面不窮，內裡卻五癆七傷，板塊欠炒作氣氛，就算有亦短癮，要食正整個反彈浪，運氣較實力重要，一個唔好彩更隨時成手蟹貨，回報與風險明顯不成正比。
憧憬泊大碼頭
內房股再傳來壞消息，有報道指中原地產被內房商拖傭，涉及金額高達25億銀，另一方面，成都地王又爆出流拍消息，內房商嚴重水緊乃不爭事實。試想想，內房股莫財，要加快資金回籠，就要有劈價賣樓一途，內地樓市前景可想而知，引發嘅財富縮水效應現象，更加不容忽視。
噚日推介嘅熔盛重工(1101)，即市一度升近半成，今日推介同樣與史玉柱拉上關係嘅東嶽集團(189)。公司早前斥資10億人仔，入股由史玉柱有份成立、有民營版中投之稱嘅中國民生投資，雖然未知有否協同效應，但泊住大碼頭，東嶽已叫人有幻想空間。
東嶽主要從事製造、分銷及銷售製冷劑、高分子材料、有機矽、二氯甲烷等產品，收益佔比最高嘅高分子材料，廣泛應用於化學、建築、電器與電子及汽車工業。
受收益減少及成本大增影響，去年盈利跌35%至4.7億人仔，但如果拆細上下半年睇，已回復增長勢頭。事實上，股價由2011年接近10元回落，調整有多冇少，公司亦於年初喺3蚊樓下回購，意味就算未見底，也去到抵買價。近日日線圖出現連環破旗現象，短線動力十足，候3.4元買入，博呢一轉可炒上四字頭。
唐牛
上一則: Follow Me：粵投升呢有望見10元 - 高彰坡
下一則: 股場放大鏡：大昌有升有息諗得過 - 歐陽風
魚樂無窮 - 唐牛 舊文