金融High Tea 2014年5月21日
內房病病地
2014年05月21日
美股連升兩日，內地股市卻反彈乏力，港股喺幾隻重磅股力撐下再升，大市成交略過500億元。
淡倉不清 指數難落
重磅股成為大戶重武器，中移動(941) 和騰訊(700，臨時代碼2988)兩隻巨企造好，已經合共向恒指進貢100點。恒指全日收報22834點，升130點；國企指數倒跌31點收市，報9884點。中移動上個月跌到七個一皮，高盛突然話4G對未來增加客戶收入有利，將評級升至「確信買入」，同時調高目標價，搞到佢股價揚升1.4元，收報78.05元。中資電訊股被視為科網崛起的大輸家，美資大行必然唱好佢，你話係咪有啲無厘頭呢？
大戶硬夾營造咗個好人為嘅小陽春，喺呢啲情況，散戶唔應該頭腦發熱，反而應該冷靜諗吓，點樣利用機會調整自己嘅陣式。
陸羽仁啱啱講起對沖基金擔心美國通縮，緣起係人民幣貶值，呢樣嘢都令熱錢流出中國，令內地房地產炒風急降溫。
今日睇到有代理商老闆喺報紙喊晒口，話喺內地做咗生意但收唔到錢，特別係二三線城市，咁不如對內地房地產市場講多兩句啦。
最近，陸羽仁有機會返內地打個白鴿轉，都有同一啲內房商見面傾吓偈。聽佢哋講，家二三線樓市情況真係好呆吓，主要係銀行放貸唔係咁鬆到，新盤賣不動之餘，有啲買家上會都做唔到，咁就變咗半天吊。如果銀行信貸唔轉鬆，喺二三線城市的情況，有可能逐步蔓延去一線城市，屆時感冒隨時變肺炎，情況都幾惡劣吓。
由於二三線樓市已經重感冒，人行早前提出「央五條」，要求內銀優先滿足首套房貸，提高貸款效率，卻普遍不被看好，但市場預計銀行不會賣帳，開發商同樣反應冷淡，理由好簡單，現時資金收緊，銀行根本不愁放貸，要借錢的企業多的是，咁仲點解要借錢畀風險高的內房商或買樓者呢？故此人行出吓政策，估計都好難扭轉銀行的市場行為，真正要改變內地樓市的生態，可能都要出到放寬存款準備金率呢啲宏觀市場措施先得。
大家係咪覺得內房股前景有啲悲觀呢？但正如早前內房股被基金急插，我叫大家唔使見淡睇得咁淡，跟住內房開始反彈，到家已經彈咗一浸。家二三線城市賣樓唔好，資金鏈嚴重受壓，情況令人憂慮，情況又點睇呢？
有雞胡食住先
首先，我估樓市氣氛轉差會持續並可能惡化，但呢樣嘢亦係促成中央放寬樓市的必要條件，即係話壞消息愈多，改變政策的機會愈大，唯有政策轉向，樓市生態先有機會改變，係最悲觀之時，可能先係見到轉機之日。
再者，樓市要危後有機，咁唔係話叫大家企係處死守等運到，因為過程會好痛苦，唔係咁易頂得順。
如果大家手頭有內房股，可以留意一下點走位。個市喺五月份接連反彈，睇個勢有可能繼續夾吓淡友，直至佢哋投降為止，喺低位撈咗或手頭有貨者，可以考慮睇位先食一食胡，由於內房仲係要等佢尋底，就算有雞胡，到咁上下時間就要先食為敬，總之，有位就要識得轉身。
陸羽仁
金融High Tea 舊文