陸羽仁 BLOG 2014年6月3日
孤獨的行軍
2014/6/3 上午 09:32:21
網誌分類: 經濟
昨日美股被美國供應管理協會(ISM) 玩咗一玩，最初公佈美國5月製造業增速大幅放緩，製造業指數53.2，差過上月的54.9，標普500指數的10個板塊隨即全數下跌。不過，幾小時後，ISM作出更正，表示製造業指數應該係55.5至啱，製造業活動係加速擴張，而唔係萎縮。更正消息公佈後，美股反彈，由跌轉升，但收回失地後橫行至收市，反彈力度一般。
ISM唔係第一次錯，過去都搞錯過一次，昨日的錯誤報告搞到市場鬱曬，Rhino Trading Partners首席策略師 Micheal Block早上被ISM誤導出咗個睇淡的報告，後來知ISM搞錯，再出份報告，題為「將ISM由顛簸調升至狀況可以，將經濟學家由無能之人調低到純種傻瓜」，都幾好笑。
結果美股被ISM玩完一鑊之後，杜指和標普500指數，昨日再創新高。杜指升26點，收報16744點；標準普爾500指數微漲1點至1925點；蘋果及谷歌腳軟，拖累納指逆市走低，納指跌5點，收報4237點。
蘋果並不如預期咁公布iWatch智能手錶，兼且無新硬件產品，只是玩軟件，公布新操作系統IOS8、健康軟件、家居操控軟件等。市場認為佢咁樣好難有銷售突破，蘋果股價回落0.6%。
「股市恐懼指標」VIX指數昨日微升1.6%至11.58，仍處於2013年3月以來的低位附近。分析認為VIX指數降至如此低的水準，令包括聯儲局官員在內的許多人士擔心，市場太過樂觀，太感到自滿。
MarketWatch專欄作家裡弗斯(Jeff Reeves) 對後市唔係咁睇好，佢認為儘管一切看上去不錯，但股市已經充分消化了所有利好的經濟因素，要股市能夠再上，關鍵在於消費支出和房地産價格必須有好的表現，但兩者偏偏疲態畢現。佢提醒
投資者必須密切關注消費開支的發展趨勢，任何消費面的遲滯都會對後市造成重大衝擊。
美國4月就業數字大幅度上揚，失業率降低到了6.3%。另外，3月消費支出數字係2009年8月以來最大的單月漲幅。近期的宏觀經濟數據的反彈，似乎證實了美國第一季度經濟疲軟，係壞天氣使然，令好多投資者鬆了口氣。然而，4月零售銷售數字的增長幅度只有可以忽略不計的0.1%，令經濟學家跌曬眼鏡。事實上，這種急劇下滑的現象，已經足夠叫人對3月的反彈提出質疑。
世界第一大零售商沃爾瑪將第一季度糟糕的業績歸咎於天氣，早在市場的意料之內，但沃爾瑪對接第二季的業績預期，也是非常謹慎。就足以證明，此前疲弱的消費情況，仍未被睇好。沃爾瑪係咁，其他的零售商都好得去邊。事實上，在這個盈利季節當中，衆多的零售商都紛紛發布了令人失望的業績，而股價自然也隨之下跌了。
至於房地產市場方面，屋價係對消費者行為影響最大的因素之一，原因係好多人可以因屋價上再按間樓搵到錢消費。儘管屋價自金融海嘯之後已有很大的幅度，令消費者情緒大為改善，但去到近期，大多數地方的房市交易清淡，甚至有少數地區的交易數字下滑了。最新的標普/Case-Shiller數據顯示，在20個重要市場當中，有13個都出現了動能減緩的情況，長期趨勢基本是持平。
里弗斯指出，美國經濟的「復甦」，其實在很大程度上都是一場孤獨的行軍，沒有得到消費者全心全意的幫助。至於股市的上漲，其中的大部分原因係過去幾年來股票市盈率的增長，股票的回購和生産率的改善。由於工資增長一直在靜止中，企業也沒有在短期內為員工加薪的計劃。國內生産總值的情況也是近三年最糟糕。由此觀之復甦的腳步並不堅實。
2013年股市狂漲30%後，已漸漸出現疲態。惟有記望在未來的一年左右，消費者和企業的開支能夠增加，經濟才能走上自我支撐的復甦軌道。如果消費支出和住宅兩方面的數據持續表現乏力，經濟在天氣轉暖之後也不升溫的話，屆時的股市，只能夠用醜陋來形容啦。
陸羽仁
回應(4) 我想回應
陸羽仁 BLOG 舊文