異動空間：捉反彈三口訣
「呢隻低位崛起第一棍，追唔追好呢？嗰隻跌咗好多，撈兩手博佢反彈好無呢？」呢類問題魏力近排答到氣咳，皆因好多「地底股」乍現耀眼的第一棍，一爆就十幾巴仙，似乎好吸引，但每日都有三幾十隻呢啲股，錢就得兩注，點揀？
先判斷大方向，人仔顯著貶值，除非突然減息降準，否則A股短線易跌難升，金融、基建股將繼續回氣。人就係冇耐性兼貪平，見唔行就沽貨（起碼減持），換馬至未升嘅股份，掃一日科網軟件股，轉頭食糊又撈濠賭股，形成板塊輪流炒。魏力留意到，當炒板塊幾乎日日唔同，反映市況不穩，連大戶都要速戰速決。電影《功夫》有雲：「天下武功，無堅不破，唯快不破。」捉反彈技巧也是如此，早市盡快搵對象，輕注出擊，尾段盡快食糊。
科網、濠賭都行咗一棍，仲有乜可留意？下輪隨時到晶片股，配合業績、圖表、回購等因素，科通芯城（400）應有力一彈。上月底以來共回購逾一千二百萬股，介乎3.9至4.3元，現價都係4.36元，防守性高。科通剛升穿各主要平均線，走勢漸入佳境，短炒可博上五蚊，執番15%。
魏力
http://www.facebook.com/2012jason
魏力
異動空間 - 魏力 舊文