一周三件：順誠博大翻身
■郭山輝任主席的順誠控股，現價處八年低位，PB得0.75倍，值博率高。 資料圖片
順誠（531）喺去年上半年已經實收六仙（六厘）高息基礎下，集團又快派全年成績單，博再收多六厘末期高息，再買美國樓市回穩，誠中線turnaround。
順誠主打實木家具產銷，近兩年兼拓展到酒店家具層面。而集團大股東兼掌舵人郭山輝，揸順誠權股去到七成，近爆燈水位。又到去年六月尾，唔計手頭高達15.4億元高流動性財務資產，順誠嘅淨現金都有二千一百五十萬元。
高息政策料持續
而順誠主打歐美地區，喺去年嘅下半年，即係順誠下半年度，美國新屋動工同新屋銷售穩定勢頭，集團嚟緊嘅全年度成績單，應該可以安全著陸，加埋財政狀況fit到爆，照計，係可以keep住派送每股末期息六仙，現價（一元）息率，挨近十二厘。
又房利美同房地美，喺上個月開始接受首期比例最低3%嘅房貸，申請首購降低門檻，為今年美國樓市打多支強心針。而房貸銀行協會就預計，今年美國新屋銷售增幅，會去到13%樓上，成屋銷售，亦都會上到5%。
又據統計，祖國上年出境人數，突破一億人次大關，增幅超過18%，出境旅遊花費一千四百億美金，增加近兩成。已經講過，祖國經濟發展，中產人數增加，出境政策放寬同簡化手續，都帶動海外旅遊需求，同環球酒店投資熱。順誠主打美國樓市同新拓酒店瓣數，繼續好景，有機會大翻身。
順誠昨收報一元，潛喺八年底，PB得0.75倍，場內行家敏華（1999）1.38倍PB、祖國同樣以出口為主嘅浙江永強，2.5倍PB，順誠起碼平咗46%。煲轉順誠，博派高息，又中線博業務翻身，當翻半番到1.5元計數，PB都先得1.2倍，仲未追到最近嘅敏華。
錢雋
細價股專家
本欄逢周二、三、五刊出
錢雋
一周三件 - 錢雋 舊文