異動空間：點解炒極得個桔
月尾又到，今個月炒股拉勻賺定蝕？魏力收到月結單，除望頂頭粒大數外，都會睇番月內做咗幾多個trade，贏輸比例如何？點解輸錢？睇完腦海都會浮現一句：好多trade都係白做！呢隻贏一萬蚊，嗰兩隻又輸番曬，原因通常係衰衝動。一星期五日，千幾隻股票，只要對住報價機，總會發掘到疑似「好嘢」。揀兩三隻掃咗，結果扣埋使費，得個炒字。
當然炒股總有中伏時，懂得止蝕外都要諗計提升命中率。近排市況混亂，魏力減少出手，降低每次注碼，止蝕位放遠一點，交易基數細咗，命中率反而提高，股票也坐得舒服。交易少咗，主因係減少短炒細價股，一來氣氛不就，二來每逢炒股仔，魏力都會分散注碼，一籃子三五隻咁去買，戰線拉長自然易中伏。
戰友在fb問了不少細價股，能力有限，恕未能每隻作出評論。細價股波幅大、入場費低，每日升跌幾成，發達好像近在咫尺。事實剛好相反，細價股是高手遊樂場，心理質素、炒作技巧均要求甚高，不適合初學者。相反，一個重組概念，會德豐（020）本月爆升兩成，中線有條件衝上五十二元水平。
魏力
http://www.facebook.com/2012jason
魏力
異動空間 - 魏力 舊文