一周三件：金衛平絕同行
■金衛主打血臍帶市場，業務擴展到廣東同浙江；圖為公司主席甘源。 資料圖片
金衛醫療（801）股價潛喺八年低位，手頭現金係家陣市值1.6倍，嚟緊派發年度成績單，仲有得博盈喜。
金衛去到上年九月尾，現金31.5億元，係家陣市值19.5億元的1.6倍。又就算減咗同期借款、公允值反映損益嘅金融負債，金衛淨現金仍然講緊有13.3億元，銀彈勁多，相當於金衛市值68%，亦都反映金衛係呢個八年低位，股價勁殘！
明年應大翻身
金衛喺上年度（三月結）見紅4.3億元，亦係搞到股價冇運行原因之一。但要咁睇，金衛呢一年大手撇減無形資產4.5億元，搞到大出血。嚟緊二○一五年度成績單，冇咗呢筆撇減，金衛一個來回，可以有盈利八千六百五十萬元，已經有得博盈喜。
再講，金衛主打血臍帶瓣數，擴展到廣東同浙江。據集團講，呢啲地區市場規模，係現有北京市場五至十倍！又金衛啱啱上年尾，以1.6億元，透過增持GM hospital17.3%股權，變相增加喺上海東方國際醫院及北京清河醫院權益。
據藥監局旗下南方研究所預計，祖國人均醫療消費，去到明年，繼續keep住21%增幅。權威Frost& Sullivan又估計，到咗二○一七年，祖國病人就診總人次，去到一百二十八億人；住院人次，亦會上到6.7億人。祖國醫療潛力勁厚，金衛嚟緊二○一六年度，應該大翻身。
又金衛連埋買GM Hosptial，而要配股後攤薄計，公司現價1.08元，PB都係得0.4倍，場內主打醫院嘅鳳凰醫療（1515），PB講緊5.6倍。祖國同樣有經營血臍帶庫瓣數嘅中源協和，家陣PB係高達31倍，金衛平到爛！博金衛翻身，當翻半番到1.6元計，PB都係得0.6倍，邊有耐追到行家水位。
錢雋
細價股專家
本欄逢周二、三、五刊出
錢雋
一周三件 - 錢雋 舊文