智取大市：高陽破旗博追落後
上次講換馬三大天條後，仲要講嚇換完馬之後嘅持貨策略。首先，可以考慮將升勢太亢奮嘅股票沽出，例如噚日嘅內房股就係好例子，呢個板塊好少喺基本因素冇大變嘅情況之下連續爆升，睇嚟升埋噚日都接近短線見頂，可以食糊。
將短線見頂風險高嘅股票沽出之後，下一步，就要將走勢最
差、基本因素最弱嘅股票沽出，例如喺之前市況太過興奮而衝入坐艇嘅股票，又或者見強勢板塊跑出而買入博追同業落後，點知落後極都炒唔上嘅弱勢股，一個字，沽！
大家將持倉內太強同埋太弱嘅股票沽出後，其餘就係走勢唔弱，但新一浪升勢醞釀當中嘅股票。由於升勢確立但未爆升，呢批股票先至係最具潛力，呢種執倉方法就可以令持倉保持偏強狀態。
投資者最重要係每日細心檢閱嚇手頭上嘅股票，睇邊啲持股能夠成為下一浪升市嘅攻擊重心，如果發現攻擊重心唔多，同時有部份持股轉弱，就係時候減持，再尋找新獵物。
講番5月第一個交易日，逢親熱門股都出現調整，但資金轉炒非熱門股票追落後，並且以細價股為主，所以全日上升股份仍超過900隻，市況其實唔差。細價股連續兩日出現大陽燭就會唞一唞氣，然後由其他細價股接力炒上，可見細價股仍係輪流炒作階段，尚未去到白熱化，預計仲有一段好日子過。
兩大優勢 短線睇4蚊
至於細隻啲嘅追落後選擇，可留意高陽科技（818）。高陽科技持有3.64億股百富環球（327），後者主要生產電子支付系統終端機，由於百富近年進軍海外生意表現理想，盈利大升，股價爆升，以噚日百富收市價11.6元計，持股市值42.2億元，相當於高陽科技市值91.4億元嘅46%。
高陽同時持有19.7億元嘅淨現金，撇除淨現金同百富環球權益之後，高陽其餘業務市值只得30億元左右。
其餘業務方面，高陽科技經營電錶業務、金融支付解決方案、支付平台解決方案業務等等。其中，電錶業務性質同威勝集團（3393）接近，威勝股價近期亦破曬頂，可想而知，內地電錶業務亦係投資者追捧嘅板塊。
目前手執百富股權兼電錶兩項強勢業務嘅高陽，自然有追落後本錢，論股價噚日突破上升旗形阻力線，論升勢只係初期。眼見百富環球同威勝股價咁強勢，高陽稍後要破頂唔係困難事，短線先睇4蚊。
晉佳
http://www.facebook.com/pages/晉佳/719009541518415
本欄逢周二刊出
晉佳
智取大市 - 晉佳 舊文