中環在線：高位減持阿里影業 大賺逾一倍
趙薇袋住先 套10億
■趙薇拎完金像獎影後，仲喺股市大賺，勁！ 設計圖片及對白 
趙薇攞完獎就攞錢！趙薇與老公黃有龍舊年底斥資31億元入股馬雲旗下阿里影業（1060）之後，阿里影業嘅股價就好
似脫韁野馬，係咁爆升，帶挈趙薇身家水漲船高，大家以為趙薇諗住長線投資，點知佢見阿里影業累計升咗超過1倍，忍唔住都要沽少少，係咁易袋番10億元先。
趙薇呢期真係人氣旺盛，早前憑電影《親愛的》獲香港電影金像獎最佳女主角，之後獲邀去美國荷里活星光大道打手印，最近又重返公仔箱，有套電視劇《虎媽貓爸》喺內地開始播映。
佢嘅財運亦相當不俗，先唔講其他物業投資，淨係講佢同老公舊年入股阿里影業，成為第二大股東之後，佢哋已經不停被人計身家。趙薇效應認真唔簡單，佢哋入股後，市場不停憧憬馬雲好快將靚資產注入呢隻殼股，刺激隻股股價節節上升。
趙薇入股成本每股1.6元，阿里影業上月初最高見4.4元，升幅接近1.8倍，難怪趙薇忍唔住「短炒癮」發作，持貨未夠5個月就減持股票。
根據聯交所資料顯示，趙薇上星期三、四分開兩日，以每股3.9元，沽出合共2.56億股阿里影業，套現9.98億元，持股量由9.18%，減至7.96%。
隨時嚇親股民
按成本價計算，佢今次賣股，賬面勁賺5.9億元，至於佢仍然持有嘅阿里影業股票，噚日市值有61.6億元，賬面利潤超過30億元，如果趙薇效應冇失靈，佢哋以後仲可以慢慢搣。
不過，呢次趙薇忽然沽貨，必然引起市場多番揣測，雖然市場成日有人話「有糊唔食，罪大惡極」，但佢係第二大股東，「Sell in May」前沽貨好易嚇親投資者㗎喎。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文