中環在線：嘉道理家族 重建加多利山豪宅
聖佐治閣毗鄰陳慧琳住所
■由嘉道理家族持有的聖佐治閣，樓齡超過半世紀。 合成全景照
今時今日大家一講本港富豪，通常都係數超人李嘉誠、恒地（012）主席李兆基、新地（016）大股東郭氏兄弟等等，好少即刻諗起中電（002）與大酒店（045）大股東
嘉道理家族。呢個家族除了經營電力與半島酒店生意，喺何文田加多利山仲有成個山頭嘅洋房收租，最近佢哋就計劃將位於加多利山山頂嘅聖佐治閣重建。
加多利山乃九龍區最矜貴豪宅地段之一，唔少名人住喺呢度，包括壹傳媒（282）創辦人黎智英與藝人陳慧琳，劉德華都係街坊。
原由拔萃男書院持有
呢度大部份都係低密度洋房，嘉道理家族𠵱家打算重建嘅聖佐治閣，零零舍舍係分層住宅，位處於山丘頂嘉道理道81A至85號。
聖佐治閣目前由3幢6層高住宅組成，共有39個住宅單位，每個單位平均超過3,000平方呎，月租超過9萬元，私隱度十足。
但由於物業喺上世紀50年代落成，樓齡有番咁上下，嘉道理家族最近就向屋宇署入則重建，預計興建4幢6層高、連地庫分層住宅，總樓面超過12萬平方呎。
雖然重建後高度不變，不過目前大廈設施欠奉，連電梯都冇，重建之後嘅租值可望有所提升。
據講，聖佐治閣嘅地皮原屬拔萃男書院所有，上世紀20年代因缺錢，而將地皮賣畀嘉道理家族，由於土地用途唔同，不受限制，所以就可以用來興建分層住宅嘞。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文