一周三件 - 錢雋 2015年7月15日
一周三件：復星博翻一番
■復星董事長郭廣昌早前用咗近3.6億元增持復星2,447萬股，每股平均價15.03元。 資料圖片
復星（656）5月先配股，引入同樣係超級大哥大嘅雙馬（馬雲、馬化騰），每股認購價講緊20蚊，復星現價仲係潛緊水。上番大孖沙落場價，復星閒閒哋要升16%，兼只係首站目標。
復星獲市場喻為「中國巴郡」同「上海和黃」，以價值投資同綜合發展見稱，旗下復星醫藥（2196）有目共睹，業績靚仔之餘，兼湊到肥肥白白，總市值上到770億元。
近年嚟，復星再銳意發展金融業，到上年底，包括保險、投資、資本管理同銀行嘅綜合金融瓣數總資產，去到1,628億元人仔，一年大升近3倍，佔總資產50%比重，唔嘢少之餘，復星已經係半隻保險金融股。
呢個瓣數，中線有潛力搞分拆，為復星帶嚟肥仔增值。再近啲，食住呢期資產升值潮，keep住為復星搵大錢。事實亦係咁，復星預計嚟緊半年度成績單，盈利會翻半番，主要就係保險板塊發展迅速。
場內專業評估，復星今、明兩年EPS1.48港元同1.6港元，現價（17.32元）預測11.67倍同10.8倍。祖國保險行家，今、明兩年平均預測14.9倍同13.3倍PE。復星預測PE平咗截。
現價入場平過雙馬
上周初，中港股市大插，復星掌舵郭廣昌真金白銀投信心一票，用咗近3.6億元，增持復星2,447萬股，最大手兼最貴一板，喺上周一，每股平均價講緊15.03元，復星現價，亦只係高出14%咁大把。
買復星，首站先望5月配股價20蚊，復星要升16%。咪忘記，呢個水位，先係雙馬兩位大哥大起步位；又復星追番祖國保險行家明年13.3倍PE，係咁意亦要升23%，到21.2元。而場內最新呢個月大行報告，畀復星最低28蚊，到最高35.4元目標價，復星講緊係要翻一番！
錢雋
細價股專家
本欄逢周一、三、五刊出
錢雋
一周三件 - 錢雋 舊文