中環在線：漢傳媒阿里影業連跌八日
霆鋒趙薇身家大縮水
■謝霆鋒持漢傳媒嘅股份，因為股災而大跌。 資料圖片 
中港股市好似食咗瀉藥咁，其中大媽至愛嘅細價股更加輪流被洗倉，呢批股份上半年真係炒個不亦樂乎，仲記得之前兩隻傳媒股阿里影業（1060
）同漢傳媒（491），前者引入金像影後趙薇做股東、後者更加引入金像影帝謝霆鋒做大股東，喺明星效應下，兩股股價真係水漲船高，帶挈兩位大明星身家進賬唔少。
■趙薇曾經喺4月尾沽咗部份阿里影業，套現10億元。 資料圖片 趙薇曾減持獲利
好似趙薇咁，佢同老公黃有龍舊年底斥資31億元入股馬雲旗下阿里影業，之後阿里影業嘅股價就好似脫韁野馬，係咁爆升，以4月高位4.4元計，短短幾個月投資回報1.75倍，可能趙薇見升到咁勁，佢喺4月尾就以每股3.9元，沽咗2.56億股阿里影業，套現10億元。
不過呢排個市散曬，阿里影業更加係連跌8日，噚日單日跌12%至1.95元，以佢沽剩嘅16.74億股計，市值32.6億元，若同歷史高位比較，趙薇身家就已經唔見咗41億元，趙薇成本價每股1.6元，噚日計仲有賺，但今日一個唔覺意跌少少，手上批股份就分分鐘要輸錢。
至於霆鋒隻漢傳媒，上兩個星期仲好好哋，創霆鋒入股以來新高，以為個倉底夠穩陣，但再穩陣嘅倉都敵唔過股災，噚日同阿里影業一樣八連跌，以霆鋒所持3.5億股計，佢身家就較高峯期唔見咗2.7億元，不過都係嗰句，霆鋒成本價0.35元，同噚日收市價0.55元，仲有大把水位。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文