一周三件 - 錢雋 2015年8月12日
一周三件：光控喜叫兩飛
■唐雙寧任主席的光大控股，食住投資升值潮，前景看俏。 資料圖片
光大控股（165）單係應佔光大證券（滬601788）同光大銀行（滬601818）市值，已超過光控本身總市值。又唔計嚟自光大證券股價增值，光控PB亦平過上市以嚟平均值，加埋半年盈喜打底，要睇。
PB低具吸引力
光控揸光大證券（佔33.3%權益）同光銀（佔3.5%權益）最新應佔市值338億元人仔，就算計埋噚日人仔再貶值，都等值415億港銀，超過光控本身總市值314億元。光控由5月高尾位33.75元，一個唔該，短短一個月，最低插到7月8日12.6元，跌咗63%，就算現價（18.74元）計數，都質咗40%過外，跌得過份咗，市值大縮水。
未計任何增值，只係以光控上年尾NAV20.75元做準，光控現價得0.9倍PB，比起上市咁多年嚟平均值1.34倍，平咗30%。仲未止，粗略計數，光控揸光大證券嘅權益等值326億港銀，比起光控上年尾，應佔光大證券權益105億元，凸章221億元，光控若果反映埋呢板增值，實際PB仲低。
又當唔計呢筆數，以場內四平八穩專業評估嚟睇，光控食住投資升值潮，去到2016年同2017年嘅預估PB，亦會進一步跌到得0.76同0.69倍，係貼近光控本身歷史低位！場內內券股同期預估PB，係講緊0.9倍到1.2倍不等，點計光控PB，都吸引到爆。就以光控上年尾NAV做準，集團去番本身平均1.34倍PB，現價係講緊要翻近半番，到27.8元。呢個水位，都仲未上到場內大孖沙所畀光控平均目標價35蚊，亦未有耐上到集團喺2007年狂牛期時，過兩倍嘅PB水位。
錢雋
細價股專家
本欄逢周一、三、五刊出
錢雋
一周三件 - 錢雋 舊文