異動空間：出口孖寶有氣勢
阿爺一聲令下人民幣一眨眼就貶值2%，假如閣下做緊50萬人仔定存，單日兌港元就唔見咗1萬銀，當你每年收3.5厘息，回報已經唔見大半，賺息蝕價真陰公。貨幣強弱反映該國經濟實力，美國經濟復蘇收水加息，萬劍歸宗令亞洲貨幣散曬，馬幣、印尼盾創17年新低；台幣5年新低、
韓圜3年低位，出口競爭力大為提升。相對跌得少的人民幣就出事，出口上月大冧8.9%，為免影響就業令經濟硬著陸，唯有跟大隊貶值。話說中央如意算盤係借股市救經濟，點知股市率先爆咗，唯有用行政手段加公安頂住先，另一邊又要出招急救出口，可說前後門齊失火，有幾狼狽毋須多講。眼見手中存款貶值，正常啲錢會流去股市（好似日本咁），但剛剛才捱完股災，成手蟹貨，仲有幾多散戶落搭先？最直接自保方法就係掃金或者買樓，就算貶值都有得放租或自住。
去番港股，恒指上到250日線即刻回曬塘，反彈隨時完成。國企改革股炒一兩日又冇力，報價機左邊中資牌力掃，右邊外資行就出貨，取態一目瞭然。比較搶眼係出口股，創科實業（669）更創收市新高，利豐（494）則絕地反彈，不妨留意。
魏力
http://www.facebook.com/2012jason
魏力
異動空間 - 魏力 舊文