一周三件：景福唯一賣點
■景福公佈5供1結果不久，就有大股東包銷。 資料圖片
景福（280）剛公佈5供1結果無耐，大股東包銷，權益大增，連埋家陣零售環境，對景福變身，或者俾投資者再問盤，又多咗幾分憧憬同可能。
供股後憧憬變身
景福呢期每股供股價0.6元，供股股數2.6億股，公眾股東只
係認購咗1,100萬股咁大把，大股東要包銷，連埋一致行動人士喺景福嘅權益，由供股前3.16億股或48.76%，增加到最新5.54億股或60.7%。呢次景福供股，話遇正中港大插插，嚟解釋小股東縮手，並無不可。但睇往績，集團對上兩個年度，見紅1.3億元同1.5億元，行家當中，景福成績單唔太醒神，小股東反應冷淡，好正常，結果係，大股東自己掏腰包去包銷。
而上年中、下旬，景福話同兩位新投資者接洽買股權，最後到今年2月，雙方傾唔掂告吹。但咁睇，景福就算經呢期供股，成間公司總市值，都係得5.4億元，街貨市值更只得1.8億元，而大股東經供股後變相增持，權益無散到。
再講，景福到今年3月尾，淨借款都係得2,970萬元，經供股後，變為淨現金1.2億元，財政乾乾淨淨。對第三者嚟講，景福係「靚殼」，仍然有優厚條件，吸引投資者去斟賣盤。而景福面對住家陣唔多醒神嘅零售市道，嚟緊又會點諗？
上年中，景福話有投資者斟賣盤時，股價單日大升44%，PB扯去到1倍。景福現價（0.59元）潛喺5年底，低供股價少少，又比起最新連供股攤薄後NAV0.94元，折讓咗37%，或現價要升59%，先上番1倍PB。景福殘爆之餘，嚟緊日子嘅唯一賣點，係有無機會變身。
錢雋
細價股專家
本欄逢周一、三、五刊出
錢雋
一周三件 - 錢雋 舊文