中環迷你裙：頭盤轉眼到甜品
■炒股同打機大同小異，經驗值是重要一環。 資料圖片
炒股同打機大同小異，經驗值是重要一環，股升時人人都識衝，但幾時應該要斬纜，或是避開伏味濃的市況，有些前輩總能夠全身而退，這就是炒股最深的奧義。本年度最頑強的美股，周三晚挫239點，股市升跌本
是恒常，奇就奇在，今次是挾淡倉後沒買盤承接，釋出訊號是，連最成熟的股市，買家也失蹤！寧死攬現金，也不願投進股市。
昨日港股，飆逾10%的股多達24隻，望住個升幅榜，經驗值話畀Samantha知不太對勁，原本好哋哋先食咗個千五點的頭盤，突然已推出甜品，最令人期待的二三線肥美安格斯牛遲遲未送來，又或是，根本係唔會來的。
近年講A股都好準的Tom DeMark，又再放話指，中港股市將彈完再散，適逢今年為金融海嘯7周年，9、10月又是傳統股災月，全球資金止步，信心如履薄冰，Sam看不到落場玩的勝算。
咁當然，港股未出現明確跌市，總有即日鮮可炒，大時代的熱炒股已變成街招，派到成街都係，唔少「街招」成本價都係10幾蚊，以至幾10蚊，蟹貨重重積壓，碰不得。反而那些生不逢時、潛進深海的半新股，首十家券商仍持九成以上，市值更跌穿殼價，這批股有機會趁反彈釜底抽薪。
Samantha
本欄逢周三、五刊出
https://www.facebook.com/stocksamantha
Samantha
中環迷你裙 - Samantha 舊文