兩件一周 - 錢雋
392公用瓣數齊
2015年09月09日
圖為北控主席王東。
北京控股(392)廿年人事幾番新，主打瓣數覆蓋曬環保國策同公用系列，可守可攻，睇位輕輕手先買一注。
北控主打燃氣，又透過北控水務(371)，發展祖國供水汙水項目，既係穩陣公用項目，兼係重點環保國策瓣數
。而集團啱公布半年成績單無耐，盈利增長10%到31億銀，靚仔。而半年打後，大圍氣氛逆轉，市場擔心經濟放緩，但北控話，積極推動燃煤鍋爐改造，所以，即使面對經濟下行壓力，估計全年燃氣銷售量，仍然有30%增幅。睇到係，集團本身有適當策略應對，避免大波動帶嚟影響。
又以呢期淡到似水嘅悲觀睇法，加埋人仔貶值後，場內最新專業評估，兼且以最低盈利預測做準，北控2015年、16年每股盈利3.55元同3.7元，現價(43.8元)預測市盈率(PE)12.4倍同11.9倍。過去10年，北控歷史平均PE講緊26倍，北控預測PE平咗截之餘，亦係貼住10年最低水平。同樣以專業評估做準，北控今、明、後三年每股派息1.18元、1.39元同1.6元，現價2017年預測息率3.6厘，高過上年2.08厘。
不妨再計數，北控喺40蚊水位，2017年預測息率，進一步上到4厘。就算美國話加息，北控呢個息率回報，肯定吸引過未來幾年紅簿仔存款息率。北控再跌，兜40蚊先撈一注，當上番瑞銀已下調咗嘅目標價54蚊，北控都講緊要升35%，明年預測16倍PE，未有耐上到10年平均值。 作者為中細價股專家
回首頁
兩件一周 - 錢雋 舊文