魚樂無窮：如果只買一隻股
■李澤鉅打骰嘅長江基建與旗下電能實業合併。 資料圖片
今年最矚目嘅公司，超人嘅長和系認第二，相信冇人敢認第一。不是嗎？年初長實及和黃宣佈世紀重組，轟動全城，完成後價值完美釋放，等同多出一間長實地產（1113），真超人也！最近，輪到佢大仔李澤鉅打骰嘅長江基建（1038
）靜極思動︰與旗下電能實業（006）合併，每一股電能可換取1.04股長建，倘合併順利完成，新長建股東（包括原有電能股東）均可獲派5元特別股息，皆大歡喜。
如果叫大家只買一隻股票，長建乃必然答案。點解咁堅定？其實以前已經講過幾次，趁而家買依然有特別息，不厭其煩講多次。
（1）業務風險低。長建主打英國、新西蘭、澳洲及中港等公用事業，包括水務、電力、鐵路等，已經好穩陣，仲要中國含量不高，更加穩陣。與電能合併後，擴軍更容易，穩健中又見增長。
（2）派息年年增。每年派息均有增加，啱曬食息一族，現價息率超過三厘，有息有升也。
（3）李澤鉅坐正。呢個最重要，以前大家只記得李嘉誠大仔、小超人，而家人人講李澤鉅，成功跳出老豆框框，肯定會出盡120%力搞好公司，未來幾個十年都係佢嘅世界。
一隻有潛力、有魄力、有回報嘅股份，我諗唔到唔買嘅理由，希望合併後有期權交易，屆時short put賺期權金兼有機會低價接貨，諗起到流口水。
唐牛
https://www.facebook.com/tongcow88
唐牛
魚樂無窮 - 唐牛 舊文