一周三件：油股兜貨良機
■市場預估中海油明年、後年將回復增長。圖為公司首席執行官李凡榮。 資料圖片
高盛啱發報告無耐，估計油價最差情況，或跌到每桶20蚊美金，令人諗起2007年瘋牛期，有大行將神華（1088）目標價，由35蚊大幅調高到101蚊。鐘擺極至，煤碳變鑽石，石油變廢水。三桶油
，中海油（883）有得諗。
高盛報告，油價20蚊美金係焦點，但無謂將最差嘅預估放大，兼永遠定格。而報告同時將明年布蘭特原油價格，定喺45蚊美金，唔係勁曳。所以，若果油價中線又再跌，提供油股兜貨良機。
料中海油增長力強
再睇硬數據。三桶油啱派半年成績單，油價跌，無運行。專業評估，中海油明年、後年回復增長，EPS0.79港元同1.15港元，增長28%同46%，兩年預測11倍同7.5倍PE。其餘中石化（386）兩年EPS增長23%同20.2%，兩年10.7倍同8.9倍PE。至於中石油（857）年兩年EPS增長37%同39%，預測12.6倍同9倍PE。講盈利增長爆炸力，中海油越放越勁，預測PE兼喺三桶油當中至抵。
又以彭博分類同級數環球行家，明年同後年預測13.7倍同11.4倍PE，中海油亦係平咗截。而專業預估中海油明年同後年每股派息0.35港元同0.45港元，現價（8.7元），兩年預測4厘同5厘息，兼係三桶油當中，預估派息最吸引。呢轉睇大孖沙最新9月畀中海油目標價同建議，3家叫買入、3家話outperform，兩家中立、兩家叫持有，無行叫沽出。而最牛嘅麥格理睇13蚊，又就算以各大行平均目標價11.3元計，中海油現價講緊要升30%，到時，集團2017年預測PE，先去到9.8倍，都仲未追到環球行家PE水位。
錢雋
細價股專家
本欄逢周一、三、五刊出
錢雋
一周三件 - 錢雋 舊文