金融High Tea 2015年9月18日
偷步食胡等消化
2015年09月18日
美股續升，加上A股回勇，港股炒偷步炒個不亦樂乎。有人問後市點睇，估計大市即時已反映一定利好，假設聯儲局不加息，短期個市抽一抽就回都唔奇，但如果儲局說法比較鬆動，譬如話推遲到年底先加息，個市消化完之後可以再炒。
港股昨日早段反覆造好，午後曾經
升穿22200點，但A股尾市突然插水，拖累港股由升轉跌，倒跌逾兩百點，尾市跌勢略收斂，險守21800點收市。恒指收報21854點，跌112點或0.51%；國指收報9964點，升59點或0.6%，成交金額898.9億元。
全球最大啤酒商百威英博，計劃向對手兼第二大啤酒公司SABMiller進行收購，華創(291) 與青啤(168) 一齊彈升，華創揚4.07%，報25.55元；青啤炒高8.61%，造37.2元，跑贏一眾國指成份股。另一隻啤酒股生力啤(236) 爆升22.66%，造1.57元。
揀股要提防暗傷
包括港股在內的全球股市偷步炒上，有中環茶友大叫失機，自詡早前及時沽咗啲貨，可惜無喺低位補番走一轉。
茶友無入貨，除咗唔知個市跌完未，另一樣係唔知買乜好，因為之前個市旺，內險、證券股都當炒，但現在時移世易，唔知呢類股有無暗傷。就算本地銀行股，都有人驚佢哋手頭上的人民幣資產，會因為貶值有損失。
美銀美林就睇好，佢話中資保險股經過上半年因股市強勁而有良好投資收益後，料下半年會聚焦於調整組合及如何保持增長；從7、8月數據來看，險商7、8月保費收入增長趨勢未有放緩，市場總體對儲蓄型保險產品需求仍強，故美銀美林對內險股基本面增長前景維持正面看法，料行業估值可望由現水平對內含價值0.99倍獲得調升，對國壽、平安、財險、太保及中國太平「買入」評級，目標價分別為36.2元、60.7元、18.7元、42.13元及36元。
另外，茶友透露依家吼緊同石油關連的股票，好似隻載通，本身係公用運輸公司，燃油係佢一大成本，油價滑落有利。但佢係跌市抗跌力唔錯，所以無乜機會買平貨！我叫佢唔回唔好買。
買股不能計死數
另一隻茶友心大心細的股份，就係隻電視廣播(511) 。茶友睇法係電視廣播話晒都係龍頭股，股價由高位跌咗過半，去年集團派過特別息，今年中期核心盈利跌咗四成，估計派息下調，粗粗地估都有六厘息。電視係現金生意，加上大股東陳國強幾年前用真金白銀收購，相信會出力撑住派息，所以心郁郁想買來長揸收息。
茶友條數計起來頭頭是道，不過我話投資有時唔可以計死數。電視市埸近年變成戰國時代，傳統電視台要同新媒體混戰，TVB大台過去優勢係壟斷咗市場，賺到豐厚利潤。過去的優勢，現在反而成了不明朗因素，如果佢唔能夠恢復壟斷暴利，股價只可以反彈，好難大升。
陸羽仁
金融High Tea 舊文