異動空間：好友究竟去曬邊
市況乏善可陳，基本上高開200點後，已知全日又係陰乾向下。大戶、散戶一去無回頭，好似出監唔會望返轉頭咁，攬住現金食花生；未走九成已重傷瞓曬喺地下，也是毫無還手之力。另一邊廂，個市弱成咁，相信淡友也始料不及，美國就業數據公佈前亦不敢再踩多腳，因如數據疲弱的話，9
月加息的機會將會急降，股市隨時來個報復式反彈。
恒指周線圖9 RSI已插至13，連歐債危機都未見過咁低，直逼金融海嘯水平，但恐怖的是，目前港股仍處陰跌市，動力已如此疲弱，不禁要問句：好友究竟去曬邊？港元續處7.75強勢，反映本港資金係多，但只是大陸錢泊港避險，並不準備入市。四大內銀及信達（1359）齊創52周新低，中國金融危機一觸即發。
A股三大期指低水一成，可見即使國家隊點托，信心危機已爆發。阿爺卻倒行逆施，進一步收緊期指交易，每日多過十張就被視為異常交易，賬戶可被封。評論多數認為無助反彈，更反問：如果都搞唔掂，下一步係咪要叫停股指期貨？股市再跌係咪會停市？這種救市是暴政而已，正義又從何談起？
魏力
http://www.facebook.com/2012jason
魏力
異動空間 - 魏力 舊文