魚樂無窮：
從港隊身上學投資
■踢足球要有「神龍」坐鎮，炒股都一樣要有隻攻守兼備嘅股票傍身。 資料圖片
股市悶悶不樂，球壇卻熱鬧非常。上周中港大戰，全城關注，最終港隊成功守和。面對中國隊水銀瀉地攻勢，港隊上下一心，90分鐘內將對手共41次攻門瓦解。
戰友睇到呢度，覺唔覺得自己同港隊情況
好相似。股市壞消息四方八面淹至︰阿爺暴力救市後又暴力貶值、新興市場股市走資不斷、美股高位岌岌可危、本地經濟處於陰乾狀態等，拖累港股一浪低於一浪，股民同樣捱打，點樣可以化險為夷，我哋一齊向港隊偷師吧！
1）門將屢救險球︰撇除「久」「狗」之辯，門將葉鴻輝全場左飛右撲，絕對係比賽焦點，有「神龍」坐鎮，肯定打高幾班波。炒股一樣，總要有隻攻守兼備嘅股票傍身，長江基建（1038）近年併購不絕，年年增加派息，倉位必不可少。
2）調兵遣將得宜︰隊長陳偉豪4分鐘傷出，教練金判坤調派另一中堅基藍馬入替，後者成功救出一次空門，實屬和波功臣之一。換馬重要性一樣，細價股唔對路，要忍痛斬纜，寧換入大價股甚至揸cash，盡量令倉位發揮最大功效。
3）好波不如好運︰中國隊攻門當中，有數次中柱或中楣，尾段港隊前鋒陳肇麒喺自己禁區犯手球，球證卻未判12碼，和波絕對包含幸運成份。呢樣嘢都有得學？炒股只要做足功課，嚴守紀律，好運自然來！
唐牛
https://www.facebook.com/tongcow88
唐牛
魚樂無窮 - 唐牛 舊文