笑到最後：
幾時要學識炒股？
上星期，本欄預測恒指重上23000點，結果即講即燈，恒指反而向下。睇錯對唔住，高明亦都因此而被市場懲戒咗一嘢。
報紙專欄生命力只得一日，而本欄每星期見報一次，除非寫明預測時效，預測時間只得一周，唔排除不久之後恒指會重上23000點，但高明所講係短線博反彈，
有效期只得一周甚至更短，唔上就要即刻認輸，冇得猶豫。
不過，今次最大教訓係，明明自己一直睇熊市、一直睇跌市，點知轉頭為咗少少利益，以為有機會而博反彈，繼而即睇即錯，輸錢事少，之後一定賺得返；輸咗對自己嘅紀律，先至係最重要。記得「智取大市」晉佳同高明講過，如果你一心睇個市跌，你又走去買股票，你好難贏錢。今次又俾晉佳言中，高明受教了。
一切由認命開始
上星期，唐牛兄講「幾時要開始學識炒股票」，高明嘅答案係：由認命開始。
股票市場除咗有集資功能之外，對於一眾冇能力創業嘅散戶及金融從業員而言，係一個可以依附能者搭順風車致富嘅樂園。
一個有能力創造價值嘅人，完全冇必要浪費學炒股。因為冇人創業，就冇上市公司；冇上市公司，就冇股票炒，亦無需要咁多金融財俊。
例如，你有能力創造Google或facebook，但你去炒股，浪費時間資本，亦不利本業。非創業類，你喺一門事業上獨當一面，例如美斯或C朗，都毋須學炒股票，專心踢好場波就夠。
有人問，畢菲特都係靠炒股發達，炒股做本業都會成功。股票價格上落造就發財機會。但輕輕讀過畢菲特「巴郡給股東的信」，他對各行業嘅了解，選用企業管理人嘅眼光，究竟佢係股神還是企業家？高明認為兩者皆是，唔係純靠炒。
唯一例外係，你本來想創業，但係冇父幹，炒股票係想「集資」。不過呢類成功例子太少，一部份炒股太易賺錢，創業太辛苦，索性炒股當創業；更多嘅係炒輸，要打工還債，創業路更遠。
最近有證券行低傭吸學生客，呢招或多或少反映買賣意慾真係低咗好多，睇耀才（1428）股價全無起色就知。高明眼中，中學生已經要為自己負責，大學生炒股合乎道德。問題係喺學生度，究竟學生覺得畢業之後都係求其打份工，炒股票當外快；定係決心創一番事業？
高明
https://www.facebook.com/bigricetea
本欄逢周一刊出
高明
笑到最後 - 高明 舊文