滙海探戈：歐元可逢高沽
儲局本月中議息前最後一個重點數據上周五揭盅，8月新增職位得17.3萬，遠遜市場估計的21.7萬，但之前兩個月就多返4萬幾，加上失業率跌到落5.1%，從就業層面而言，已達到加息門檻。
市場憧憬量寬加碼
但通脹門檻仲未達標，加上環球股市俾阿爺玩殘，連美股亦走曬樣，家
陣估儲局9月17日加唔加息等同買大細。
事實上，眼見環球經濟吹淡風，歐洲央行上周議息後，行長德拉吉率先表態話有需要就會加碼放水，如果加拿大、新西蘭同英倫銀行本周議息後亦表達類似想法（市場更預測新西蘭本周再減息），美國獨自加息恐怕要付出更大代價。
美滙指數上周微升0.1%報96.23，彭博社資料顯示，16隻主要貨幣當中，只有日圓和瑞典克朗上升，前者漲2.3%最省鏡，表現最差又係幾隻商品貨幣，巴西雷阿爾跌6.8%最傷，南非蘭特、澳元和紐元，分別下跌4%、3.7%及2.8%排榜尾，其中澳元連70美仙亦失守低位曾見69.07美仙，再創逾6年新低。
反觀近期每當市場恐慌情緒升溫下，歐元都受惠套息交易拆倉而挾高，但隨著氣氛改善而打回原形，加上歐洲央行上周下調經濟和通脹預測，市場炒作加碼放水概念，短期可逢高沽。歐元反彈至1.12至1.135範圍可吼位開淡倉。
奇兵
本欄逢周一刊出
奇兵
滙海探戈 - 奇兵 舊文