笑到最後：投資還是美帝好
回顧第四季，原來高明只推介過兩隻股票，其餘時間唔係講樓就係講其他嘢，始終投資最磨人係等候，心急亂下注，不如集中一兩注，一兩注贏少少，好過十幾注有贏有輸打個和。
今季主要推介兩隻股票都同美國有關，第一隻就係喺《周日投資導航》推介嘅創科（669），建議買入價28
元，推介後又離奇回落至買入價，到出業績後股價創新高，技術上掂到33蚊目標價，升17.86%。另一隻直頭係美股Activision Blizzard，推介時買入價33.96美元，剛好遇上股價升軌調整期，最高見過39.8美元，最新報38.92美元，升14.61%。兩個推介都有雙位數字，勉強算有交代。
不過，今日並不打算認威，網上睇到台北市長柯文哲的一條短片，話佢上任一周年，冇拉banner話自己成功爭取啲乜，反而反省自己嘅過失。仔細一諗，《笑到最後》由今年1月寫到𠵱家，都接近一年，都係時候反省嚇錯過啲乜。
殼股今季升幅秀麗
今季係反彈一季，上述得百分之十幾回報，其實不值一題。好多殼股升幅倍計，如孫柏文好耐前推介過嘅中慧（1143），今季升多過3倍；近近哋中建置地（261），聖誕前開快車，都升逾倍。
不過因為A股股災嘅時候，高明都承受過一啲流動性不足嘅問題，所持股份走唔到，唔敢再推介呢啲股票，甚至因為大陸亂咁嚟，覺得連中資都信唔過，而殼股買手都不過係中資，所以今季寧願轉買美國相關股，都唔買中資股，錯過咗第三季殼股小陽春。
另外，本欄自開欄一路相信：凡是中國公佈的好消息，就是出貨的好時機。例如年初市場憧憬兩會，高明話當佢流落車，結果3月初，港股真係跌到一仆一碌，兩會後又好番。
再強嘅信念，都敵唔過市場氣氛，特別係港股大時代前，高明先誤判，清貨去度假。旅行期間個個贏開巷。返到嚟，因為市況太好，相信同市場所有玩家一樣，高明隨意貼啲股都會中，於是心雄，忘記咗官媒話一萬點，即係走貨時機。冇同大家講散水，係高明誤判。
嚟緊一年，唔能夠再被市況波動迷惑，揸緊宗旨比起其他更重要，特別係中國經濟轉差，好有可能再用股市玩財技。
高明
https://www.facebook.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com