智取大市：中國命運看美滙
■弱美元、強人民幣因素對中國嚟講好重要，呢期要睇實。 資料圖片
今個星期美國聯儲局主席耶倫發言之後，美國加息預期冷卻，美滙指數一連3日走弱，令人民幣走強嘅條件增加，理論上可以紓緩今年首兩個月中國面對嘅走資逆境，所以星期三恒指升457點實在合理不過。呢個咁好嘅消
息，理應要令港股好有動力一鼓作氣衝上去，先能夠交到差，小弟就當呢嚇係港股一個好好嘅測試，未來兩個交易日要見到資金搶高港股，千祈唔好派貨。
今年頭兩個月大家睇住油價做人，但呢一刻，大家一定要睇美滙指數，因為弱美元、強人民幣因素對中國嚟講太重要。如果美滙指數free fall，人民幣滙價冇咗貶值預期，好多問題可以buy time去拆彈，股市亦有一段蜜月期。假如咁嘅消息之下，美元依然跌唔落，就可以視為美元壞消息出盡，分分鐘仲升得急過之前，到時對於中國嘅衝擊，恐防唔係今年頭兩個月咁簡單。
之前奧巴馬講過唔想中國衰到貼地，小弟又信係真心話，佢應該係想中國衰衰哋，但衰到金融體系大爆炸就肯定拖冧埋美國，所以耶倫周二係話加唔加息甚至再QE都要睇中國因素，成件事好合理。今次劇本寫得好白、好白，食粥食飯睇未來幾日美金走勢，策略上，睇住美滙指數跌破92.5支持位就係好兆頭，掉番轉向上突破至耶倫講話之前高位96.4嘅話，肯定大事不妙，呢個劇本下，港股破底機會大增。
晉佳
https://www.facebook.com/advanceguy1/
晉佳
智取大市 - 晉佳 舊文
來源 source: http://hk.apple.nextmedia.com