智取大市：ETF風潮變風暴
■美股上周五指數股跌勢平均，顯示有可能係被動式投資出現巨額贖回潮。 資料圖片
美股大跌市，可能係被動式產品嘅槓桿投資惹禍。
道指過去一年跑贏反映細價股表現嘅羅素2000指數，原因係被動式指數產品獲大額資金流入。美國ETF資產規模近3萬億美金，2017年有成4
,660億美金流入，大價股進一步被推高。
槓桿投資被動式股票產品潮流就咁出現，大概分為兩種，第一，槓桿股票ETF嘅產生，槓桿倍數加大1倍到3倍不等，目前美股槓桿ETF資產規模已達330億美金；第二，資金借錢去買賣普通股票ETF或非上市指數基金。
槓桿ETF同大部份被動式投資產品，為咗不斷吸引新客，即使指數係咁升，都會將槓桿倍數保持喺相同水平，無論你幾低位去買一隻槓桿4倍嘅ETF產品，你持有期間都係背負住4倍槓桿風險，換言之，當指數下跌25%，本金都會跌到近乎零，呢啲就係魔鬼細節。
當被動型投資產品出現巨額贖回，令指數快速下跌，就會形成骨牌效應。美股上周五指數股跌勢平均，跡象顯示有可能係被動式投資出現巨額贖回潮，令沽壓集中喺大價股之上，呢種情況喺過往一年從未出現。
由於ETF投資係近年環球股市主要推動因素，一旦贖回潮出現就令呢方面資金流突然由正變負。今次似係ETF資金流真逆轉，多過又狼來了嚇鬼，所以保本要緊。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com