中環在線：
想爭金飯碗 由暑期工做起
■入到金管局做MT嘅話，話唔定有機會跟陳德霖學嘢。資料圖片
政府工叫「鐵飯碗」，金管局嘅工，有人叫「金飯碗」，除咗人工高之外，喺ifc返工都幾威威㗎。不過究竟大學生點先可以整靚個履歷，然後申請人工4萬蚊嘅見習經理（MT）職位呢？原來大學生本身已經
有好多條捷徑可以行。
華華搜集資料發現，如果你係大學一年級嘅話，其實可以等到7月至8月金管局招聘學生大使，工作性質係去資訊中心做嚇導遊，推廣嚇時令項目咁，時薪有55蚊㗎。
當你由新仔升到去大學二年、三年級，就可以正式申請夏季實習，月薪有9,000蚊，今輪招聘喺本月16號就截止喇，要申請就要快。
如果覺得實習唔夠挑戰，大學生亦都可以參加金融科技人才培育計劃（FCAS），主責做金融科技範疇，月入由1萬至1.6萬蚊到，想報名嘅話，本月10日可以去金管局資訊日，不過最終可能係派去銀行做，而唔係金管局返工。
如果呢啲全部做齊，CV已經非常靚仔，就可以預備報MT。金管局MT不限學科（當然商科梗係有優勢），招聘月份通常都係9月至10月，人工筍有成4萬蚊唔使講，28日年假好過好多私人企業，兩年見習期間去2至3個部門培訓，會唔會有機會跟總裁陳德霖學嘢？話唔定㗎。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com