經濟客艙：
人生喺等待跌市中渡過
■好多人等樓市大跌至買樓，到樓價真係跌，又要再等更「抵價」，結果人生喺等待中度過。 資料圖片
有人話，人生好多時候喺等待中渡過，講到底就係冇咗份豁出去博一博嘅勇氣，為做不到的事情，找找藉口。
香港樓價並非人人負擔得起，總有些人日日望
樓價急轉彎、樓價下跌，提供一個合適嘅入市良機。不過，現實通常趕不上變化。成日等香港樓價勁跌先入市買樓嘅人，就好似玩梗《旅行青蛙》咁，玩梗一款waiting game。
玩《旅行青蛙》，打開個Apps睇睇隻青蛙冇返屋企，然後出去摘嚇三葉草、儲嚇「貨幣」。大家可能內心經歷啲掙紮，「究竟課唔課金買道具好呢」，最後都係唔買。又有人等嚇等嚇，索性喺fb或者IG貼文發哀號，「點解仲唔返嚟呀！又去咗邊度旅行！」
香港想置業嘅人，喺等香港樓價下跌嘅waiting game入面，就冇《旅行青蛙》咁過癮。樓價冇得預知幾時跌定升，等待過程之中，就要努力工作，冇得好似《旅行青蛙》咁有人供養兼可以隔時去旅行。等待過程之中，有人選擇不吃不喝，盡快儲首期上車；也有更多幸運兒有慈父慈母「課金」，不用為首期煩惱，有上車捷徑。
不過，玩香港樓價呢個waiting game嘅人，好多時候「等」，只為買唔到樓搵個藉口，等嚇又等嚇，到樓價真係跌，有些人同樣不認為合適入市機會，又畀投機同顧慮影響，再等下次跌市先出手，結果等嚇又等嚇，為咗更「抵價」去買樓，咁人生喺等嚇又等嚇中就渡過了。
FB: https://www.facebook.com/seeforcaptain/
Captain Cool
經濟客艙 - Captain Cool 舊文
來源 source: http://hk.finance.appledaily.com