操盤手札記 - 割柑人 2019年4月23日
馬上成為壹會員
會員註冊/登入
操盤手劄記：有回購唔怕揸兜 - 割柑人
ING一個研究模型揭示，歐元區自2013年起已有「日本化」跡象。 適中字型 較大字型
復活節長假前，港股三萬關得而復失。地球另一邊，美股首季業績開局唔錯，已公佈季績嘅標指成份股中，78%好過預期，市場對盈利倒退鬆一口氣，上周道指、標指、納指都錄得升幅，升近歷史高位。不過，基金經理仍然偏向審慎，究竟驚乜？
上周美銀美林每月基金經理調查出爐，三分之二基金經理認為全球經濟將會面對低增長、低通脹，係兩年半以嚟最悲觀。基金經理最擔心嘅三大風險，依次係貿易戰、中國經濟放緩、貨幣政策失效，後者更係首次上榜，相信係驚即使一再放水，經濟仍無起色。
低通脹有乜好驚？日本有辦你睇！「安倍經濟學」代表嘅第三次量化寬鬆，推出至今六年，通脹仍未達標。通縮心態加上人口老化，正係阻力。呢種情況有向外蔓延之勢，ING一個研究模型揭示，歐元區自2013年起已有「日本化」（Japanification）跡象。
歐元區最新核心通脹只比紀錄低位高0.2個百分點，歐洲央行嘅貨幣政策似已無符。難怪喺基金經理調查中，做淡歐股連續兩個月成為最擠擁交易！歐洲經濟低迷，作為百業之母嘅銀行首當其衝，喺歐洲有業務嘅滙豐（005）、渣打（2888）點睇？
滙豐、渣打嘅盈利來源，主要嚟自亞洲，而非歐洲；而且，兩行仲有一道板斧──回購，可推升股價，提升股本回報。滙豐過去三年都有回購，不過，今年暫時無影；至於渣打，據《星期日泰晤士報》講，該行準備回購10億美元股份，計及審批，最快7月尾開始。
渣打舊年11月22日已曾傳出研究回購，當日股價一度抽升5.3%。集團上次回購，係2002年回購優先股。渣打復活假前收67.95元，跌1.8%；今年以嚟，則累升16.6%，跑贏滙豐近10個百分點。坊間戲稱「揸兜Bank」嘅渣打，若果落實回購，點都唔使揸兜！
割柑人
本欄逢周二刊出
操盤手札記 - 割柑人 舊文
來源 source: http://hk.finance.appledaily.com