【智取大市】油金為何差天共地 - 晉佳
黃金最大需求，來自中、印購買首飾作嫁娶之用。
資料圖片
金價升到7年高位，油價跌到18年低位，係單純避險因素令表現差天共地？話油價跌至18年低位，純粹係由價格去量度。喺1998年12月，亞洲金融風暴之後，油價低見10美元左右，之不過，今時今日美金
貨幣供應比當年上升2.8倍，換言之，今日嘅38美金，係1998年10美金嘅同等價值，因此油價目前係幾十年嚟最低迷時間。
從需求去睇，石油嘅用途無可否認不斷減少。正因為石油有用盡嘅一日，於是人類透過唔同技術，設法搵出石油替代品，最典形例子當然係電動車，仲有唔少石油副產品不再用石油。與此同時，亦要留意煤炭、火電長遠都逐漸被唔同嘅再生能源取代，長遠只會步石油後塵。
黃金最大需求來自中、印首飾嫁娶需求，呢方面需求彈性偏低，至於貨幣、避險需求屬其次，但需求彈性偏高。於是，市況少少差，通常資金會買黃金，但當市況好差，會危及實體經濟，金價會因為首飾需求下降而急跌。至少，黃金仲有能力跟隨貨幣供應而增長，除非中國人唔興戴金。
油價瞬間跌到20美金，當然係低殘，跌勢亦似喘定，但50、60美金可能一去不返。喺2016年，油價4個月內由低位反彈近1倍，今次彈到40美金嘅話，已經算好好了。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://s.nextmedia.com