【異動空間】圍爐焗追宅經濟股 - 魏力
畏高又想搵嘢炒的話，可以試嚇即市搞波音，一晚的波幅足夠轉身有餘。 資料圖片
恒指反彈跌浪38.2%後遇阻，美國銀行股業績遠遜預期，滙控（005）、友邦（1299）又無運行。三大重磅股已斷兩腳，得返隻騰訊（700）狂撐，反映再彈空間不多。不過，「兩
會」前A股有政策憧憬，華府又準備公佈復工，中美托住之下，港股要直插大散又未有催化劑，似會幾百點chok住上落，儲嚇牛熊再定去向。
恒指暫時守住10天線、上升楔形支持，以及杯柄頸線，三者目前均在23800水平，一日未確認跌穿，仍可視為回吐，之後有權再上。但操作上，魏力已減倉一半降風險，如後市再上，補返貨不會太蝕章；反之跳崖的話，亦會感恩在高位已減半倉，輸少好多。
美股方面，強弱極為懸殊，「宅經濟」亞馬遜（AMZN）、Netflix（NFLX） 逆市連創新高，實體股如Caterpillar（CAT）技術反彈後水已散，市場聚焦企業首季業績，操作上只能跟紅頂白，圍爐掃表現硬淨嗰堆。畏高又想炒嘢的話，可以試嚇即市搞波音（BA），一晚的波幅足夠轉身有餘。美聯儲無限放水，又有華府拍心口bailout，應該唔會再穿100蚊，但落場炒即日，當然要身手靈活，睇圖技術亦要有返咁上下。
筆者為證監會持牌人，持有亞馬遜、Netflix財務權益
魏力
http://fb.com/2012jason
本欄逢周一、五刊出
異動空間 - 魏力 舊文
來源 source: http://s.nextmedia.com