金融High Tea 2013年1月23日
金融High Tea——殼味香濃
2013年1月23日
美股休市，內地反覆回軟。港股朝早低開，幾個主要板塊好似內銀、地產都變動唔大，內房則個別炒上。市場等咗好耐嘅前海發展區，終於有消息蒲頭，大市馬上「生曬」。恒指收市漲68點至23658點，大市成交回升至724億元，不過，股仔紛紛起動，好多毫子股炒高2、30個巴仙，兜得正都幾和味。
港股雖然再創19個月新高，由於頻頻出現配股集資活動，同時上升動力明顯不強，資金改為輪流炒作個別行業，令大市呈個別發展。借住市場傳出，深圳市政府將很快審批前海《土地出讓暫行辦法》等土地政策，並與三大地主包括協商已招商局集團、本港上市的中集(2039)和深圳國際(152)所擁有出讓土地營運方案，市場估計三大地主擁有三幅土地總估值高達4700億元，總之人有多大膽、地有多大產，你敢講，就有人敢炒。
半醉半醒最享受
相關股票炒到風生水起，深圳國際收市飆升兩成一至1.09元；中集集團都唔執輸，抽高一成八至16.46元；招商局國際(144)相對較弱，收市亦收高8.8%至28.4元。
前海概念已經醞釀咗好長時間，突然之間相關公司好似執到寶，講到價值天咁高。通常呢類產股有好多細節要傾，就算相關公司擁有產權，都唔直接等如可以發展，不過，呢啲時間資金開始追捧細價股，大家搵緊概念，總之講得出就炒住，沾手呢類股份，正確態度係半醉半醒，人人炒到癲晒的時候，你一係行開唔玩，一係就唔可以太清醒一味計數，因為計住數一係搞到你縮窒縮窒，或者搞到你信以為真，以為真係買緊基本因素，所以最好係醉醉哋跟住人起舞，但就保持小小清醒，識得係舞會終結前離場。
幾隻前海概念股，升得最勁係原本股價唔夠一元的毫子股，大價股份反而升得無咁癲。拉闊啲睇，昨日好多毫子股都炒得好開心，特別係個別內房殼股明顯有有追捧，內地金地集團持有逾五成股權的星獅地產(535)，全日再漲0.04元或59%，收0.93元，由於市場憧憬內房來港買殼未停，地產股份炒味特別香濃。
好醜係股都可炒
昨日十大上升股份九隻股價唔夠一元，排第一升足七成的中海船舶(651)仲係仙股𠻹。中環茶友話，個市升到咁上下，大股要唞氣，跟住就會炒吓毫子股，呢類股份好多跌到茶渣價錢，部份有資產，部份則係垃圾，但係升市中，總之好醜都係股，點都吸引到人鑊鏟一番，估計呢種氣氛會炒番兩、三日。
中央多個部門昨日啟動企業併購重組計劃，涉及九個行業，包括鋼鐵、水泥、汽車、機械製造、電子資訊、造船、稀土、電解鋁和農業，共約900家上市公司，佔目前A股上市公司的一半，總市值超過4萬億元。
對於中央這次推行九大行業兼併重組方案，業內人士普遍睇好，中銀國際認為，在行業深陷產能過剩泥潭的當前，加快兼併重組提升產業集中度，可以淘汰落後產能，優化產業結構。以鋼鐵行業為例，兼併重組可以逐步提升龍頭鋼企地位，龍頭企業可以得到政策扶持，企業競爭能力、創新能力都會有所提升，產業可以更好發展。企業重組，明益行業龍頭股，睇吓就要睇相關股份跟住有無反應嘞。
陸羽仁
上一頁 下一頁
金融High Tea 舊文