金融High Tea 2013年2月20日
金融High Tea——傳媒股好難炒
2013年2月20日
■南早因私有化概念就炒上，但結果南早出通告，話正與第三方就可能收購香港一組媒體公司磋商，復牌即跌。資料圖片
內地中房協副會長朱中一上個月警告，當前中國房地產市場正在回暖，如果升勢「不理性」，阿爺好有可能推出新一輪調控政策。隨着人大政協兩會下月將會召開，市場對中央加碼調控樓市政策的憂慮升級，內地房地產股昨日跳水，拖累上證綜指大跌超過1.6%至2383點，失守2400點大關。我話除此因素外，內地太多人造定好倉等農曆年後開紅盤，亦俾大戶插低食一浸。
A股插，港股亦無運行，恒指亦跌238點或1%至23144點；國企指數仲傷，跌210點或1.8%。內房股就慘啦，龍頭股中海外(688)及華潤置業(1109)分別跌3.3%及4.4%。
富士康升勢未完
港股昨日跌勢幾全面，比較另類的是有大行唱好的富士康(2038)，逆市勁升6.4%至3.31元。美銀美林首次俾富士康「買入」評級，目標價4.3元。該行預期，內地山寨智能手機將分別佔富士康2013及2014年銷售的13%及24%。隨着山寨機銷量向上，將有助改善富士康今年下半年毛利咁話。富士康近期可能在3元左右已經尋到底，昨日升得急或者會回吐，但升勢未完，未來可能會反覆向上。
前日南華早報(583)一度掀起一個本地傳媒股炒浪，佢自己升咗22.8%(當日最高升31%)，連帶一眾傳媒股亦被炒起，例如揸住明報的世界華文媒體(685)前日升9.6%。
南早一炒高就有人追，皆人好多人都估佢會私有化，隻嘢市值30億左右，但手上揸住一塊清水灣地皮，估值已過20億，扣咗地皮即係報紙生意只係當10億，但佢前年賺3.7億，所以好有私有化潛質。問題係大股東郭鶴年家早年提過私有化但不成功，外界成日估佢幾時再來，一有風吹草動即炒。
郭鶴年家族持有南早90%股份，公眾持股只有10%左右，不合至少25%公眾持股規定，早年搵幾間銀行搞個協議幫手揸吓股，夾硬做到符合公眾持股規則，但協議到期股份又去番郭家手上，再唔批股出街，港交所呢個月底就要停佢牌，所以前日見到股價郁，人人估佢私有化就炒上。
南早收購無得炒
股升有人追，前晚都有朋友問我南早買唔買得過，我話要睇通告，若然是私有化，仲有得玩吓，若然只係批股出街，無得炒喎。結果南早出通告，話正與第三方就可能收購香港一組媒體公司磋商。南早公眾持股不足，好可能透過買嘢時增發新股作為收購代價，攤薄現有股權，令大股東持股降到75%以下，以符合上市規則要求。除非買到超筍嘢(市場上唔多)，否則唔應該令股價升，甚至為買而買，股價應該跌𠻹。
結果南早復牌，股價跌7.5%，其他前日升咗的傳媒股都要跌。我認為如果南早最後只係買普普通通的生意，股價根本唔應該升，還有回落空間，可以去番急升前的水平。香港傳媒競爭好大，傳媒股好難炒，要等到市場升勢擴散得比較厲害時，才會真正炒到傳媒股。
茶餐廳翠華控股(1314)去年11月上市時，分析員普遍都唔睇好，點知上市後愈升愈有。昨日開市4.15元，收市4.01元，較月初再漲25%！上市後勁漲77%，遠遠跑贏恒指。我好粗略咁估佢至今年3月全年賺1.5億，以現在在升到55億市值計，市盈率37倍，好貴喎。升咁多一定有人炒，但呢啲股能炒不能揸也。
陸羽仁
上一頁 下一頁
金融High Tea 舊文